سهرۆك بارزانى: پارتى ئامادهیه بۆ ههلبژارتنهكێ دویر بیت ژ دیزاینێن پێشوهخت
گاڤ
سهرۆك مهسعوود بارزانى ل سهلاحهدین پێشهوازى ل بالیۆزێ فرهنسا ل ئیراقێ پاتریك دوریل كر، د دیدارهكێ دا ههردو ئالییان باس ل پهیوهندیێن دیرۆكى و دو ئالیێن گهلێ كورد و فرهنسا و پشتهڤانییا وى وهلاتى بۆ مافێن گهلێ كورد كرن، دیالۆگا نێڤبهرا ههولێر و بهغدایێ و پرسا ههلبژارتنان ژ تهوهرێن سهرهكى یێن دیدارێ بوون.
پاتریك دوریل راگههاند، فرهنسا ههردهم دێ وهكو ههڤسۆز و پشتهڤانا گهلێ كوردستانێ مینیت و گۆت ژى، دڤێت مافێن گهلێ كورد د چارچووڤهیێ ئیراقهكا فیدرال دا بهێنه پاراستن، خۆشحالییا خۆ ژى ب دیالۆگا نها یا دناڤبهرا ههرێما كوردستانێ و حكومهتا فیدرال دا نیشاندا بۆ چارهسهركرنا كێشهیێن دناڤبهرا ههولیر و بهغدایێ دا.
ژ لایێ خۆڤه سهرۆك بارزانى سپاسییا فرهنسا كر بۆ رۆلێ دیرۆكیێ وى وهلاتى د پشتهڤانیكرنا مافێن گهلێ كورد دا، ل دۆر كێشهیێن ناڤبهرا ههولێر و بهغدا ژى سهرۆك بارزانى راگههاند، كیشه د بنپێكرنا دهستوورى و پێگیرینهكرن ب رێككهفتنان و بزاڤكرن بۆ لاوازكرنا پێگههێ ههرێما كوردستانێ دایه، ههروهسا سهرۆك بارزانى گۆت، بودجه و شایستهیێن دارایی یێن ههرێمێ مافهكێ سروشتى یێ خهلكینه و نابیت وهكو كارتهكا سیاسى همبهر ههرێمێ بهێنه بكارئینان، سهرۆك بارزانى پشتهڤانییا خۆ ژى بۆ دیالۆگا دناڤبهرا ههرێما كوردستانێ و حكومهتا فیدرال دا نیشاندا و ب باشترین رێك زانى بۆ چارهسهركرنا كێشهیان.
د تهورهكێ دیدارێ دا ل دۆر ههلبژارتنێن ههرێما كوردستانێ سهرۆك بارزانى راگههاند، پارتى ئامادهیه بۆ ههلبژارتنان لێ ههلبژارتنهك بیت دویر ژ دیزانێن پیشوهخت و كێشهیێن یاسایی و تهكنیكى، ههروهسا دهرخهرا ئیرادهیا راستهقینه یا دهنگدهران بیت.