گاڤ

وه‌زیرێ بازرگانیێ ئیراقێ راگه‌هاند، ئه‌و نێزیك دبن ژ مه‌زنترین وه‌رزێ ب بازاڕكرنا گه‌نمى و پێشبینى دكه‌ن 6 ملیۆن و نیڤ ته‌نێن گه‌نمێ جۆتیاران بكڕن و بڕیاره‌ بها وه‌كى پار سال بیت.

ئەسیر غورەیری وەزیرێ بازرگانیێ ئیراقێ راگه‌هاند، پێدڤى یه‌  ١٥ رۆژان به‌رى گه‌هشتنا كه‌شتیێن بازرگانى یێن ئه‌رزاقى و ده‌خلودانى ئاماده‌كاریێن تمام د وارێ ڤه‌گوهاستنێ دا بهێنه‌ كرن و سه‌رجه‌م شۆفێرێن بارهه‌لگران رێنمایی پێ بهێنه‌ دان بۆ پێگیریكرنێ ب ده‌مێ دیاركرى بۆ داگرتنا داخلودانى و هه‌ر شۆفێره‌كى سه‌رپێچیێ بكه‌ت، دێ لێپرسین دگه‌ل هێته‌ كرن.

گۆت ژى وه‌رزێ ئه‌ڤ ساله‌ یێ ب بازاڕكرنا گه‌نمى دێ مه‌زنترین وه‌رز بیت د دیرۆكا ئیراقێ دا ژبه‌ر كو ئه‌و پێشبینى دكه‌ن 6 ملیۆن 500 هزار ته‌نێن گه‌نمى ژ جۆتیاران بكڕن.

پێشتر ژى وه‌زیرێ بازرگانیێ ئیراقێ راگه‌هاندبوو، ئه‌ڤ ساله‌ وه‌كى پار، هه‌ر ته‌نه‌كێ گه‌نمى دێ ب 850 هزار دیناران ژ جۆتیاران كڕن.