گاڤ

كریستیانۆ رۆنالدۆ ستێرا پۆرتۆگالى یێ یانه‌یا نه‌سر یا سعوودى داخوازا بهێزكرنا رێزێن تیمێ دكه‌ت و ژ كارگێرییا یانه‌یێ دخوازیت د مێركاتۆیا هاڤینا بهێت دا هه‌ڤبه‌ستێ ل گه‌ل دو ستێرێن خۆلا پرایمه‌ر لیگ یا ئنگلیزى ئیمزا بكه‌ت.

تۆڕا Sportskeeda یا بریتانى ئاشكرا كریه‌ "رۆنالدۆى داخواز ژ كارگێرییا نه‌سر كریه‌ هه‌ڤبه‌ستێ ل گه‌ل لویس دیاز یاریكه‌رێ لیڤه‌رپۆل و بێرناردۆ سێلڤا یاریكه‌رێ مانچێسته‌ر ستى ئیمزا بكه‌ت".

هه‌ڤبه‌ستا لویس دیاز ل گه‌ل لیڤه‌رپۆل تا سالا 2027 به‌رده‌وامه‌ و ئه‌و یاریكه‌ره‌كێ سه‌ره‌كییه‌ د لیڤه‌رپۆل دا كو د ڤى وه‌رزى دا پشكدارى د 44 یارییان د هه‌مى قاره‌مانییان دا كریه‌ و 13 گۆل تۆماركرینه‌ ل گه‌ل 4 ئه‌سێستان، ئه‌ڤ چه‌نده‌ ده‌لیڤه‌یا ڤه‌گوهاستنا وى بۆ نه‌سر ب زه‌حمه‌ت دئێخیت.

هه‌روه‌سا رۆنالدۆ دخوازیت بێرناردۆ سێلڤا یێ پۆرتۆگالى ژى بهێته‌ دناڤ رێزێن نه‌سر دا، لێ ئه‌و ژى یاریكه‌ره‌كێ سه‌ره‌كى یه‌ ل گه‌ل مانچێسته‌ر ستى و د 40 یارییان د هه‌مى قاره‌مانییان دا ل ڤى وه‌رزى پشكدارى كریه‌ و 10 گۆل تۆماركرینه‌ ل گه‌ل 5 ئه‌سێستان.