ئه‌رێ هه‌لبژارتنێن په‌رله‌مانێ كوردستانێ دێ ل خزیرانێ هێنه كرن؟
بەلاڤ بکە
گاڤ
ژێده‌ره‌كێ راگه‌هاند؛ دهێته چاڤه‌رێكرن هه‌لبژارتنێن په‌رله‌مانێ كوردستانێ یێن ل به‌ره ل 10ى خزیرانێ برێڤه‌بچن، بهێنه پاشئێخستن و لێكتێگه‌هشتن دناڤبه‌را هه‌ولێر و به‌غدا دا بۆ پاشئێخستنا هه‌لبژارتنان هه‌نه.
به‌رى نوكه پارتى دیمۆكراتى كوردستان و هنده‌ك لایه‌نێن مه‌سیحى و توركمانى و بزاڤا ئیسلامى بایكۆتكرنا هه‌لبژارتنان راگه‌هاند بوون.
بڕیارا بایكۆتێ یا پارتى و پێكهاته‌یان ژ به‌ر بڕیارێن دادگه‌ها فیدرالى بوو و ژ وان ژى هه‌لوه‌شاندنا كورسیێن كۆتایێن پێكهاته‌یان د په‌رله‌مانێ هه‌رێمێ دا و كێمكرنا كورسیێن په‌رله‌مانى ژ 111 كورسییان بۆ 100 كورسییان.
دهێته چاڤه‌رێكرن د رۆژێن بهێت دا، سه‌رۆك نێچیرڤان بارزانى ل گه‌ل سه‌ركرده‌یێن لایه‌نێن سیاسى یێن هه‌رێما كوردستانێ ژ بۆ به‌حسكرنا بابه‌تێ هه‌لبژارتنان كۆمببیت.
ژێده‌ره‌ك ژ حكومه‌تا هه‌رێمێ پێشبینى دكه‌ت هه‌لبژارتنێن په‌رله‌مانێ كوردستانێ ژ بۆ ده‌مه‌كێ دى بهێنه پاشئێخستن.
وى ژێده‌رى بۆ رۆژنامه‌یا ئه‌لعه‌ره‌بى ئه‌لجه‌دید ئاشكرا كریه "لێكتێگه‌هشتن دناڤبه‌را هه‌ولێر و به‌غدا دا ل دۆر پاشئێخستنا هه‌لبژارتنان هه‌نه".
دیار ژى كریه "به‌غدا دزانیت د شیان دا نینه هه‌لبژارتن بێى پشكدارییا پارتى برێڤه‌بچن و به‌غدا نه‌ڤێت قه‌یرانه‌ك ژ به‌ر ڤێ چه‌ندێ په‌یدا ببیت".
ئاماژه ب وێ چه‌ندێ ژى كریه "د ده‌مێ بۆرى دا، په‌یوه‌ندى و دیدار دناڤبه‌را محه‌مه‌د شیاع سوودانى سه‌رۆكوه‌زیرێ ئیراقێ و سه‌ركرده‌یێن كورد دا ل دۆر ڤى بابه‌تى هه‌بوون".
راگه‌هاند ژى "سوودانى ل دژى پاشئێخستنا هه‌لبژارتنان نینه و بابه‌تێ پاشئێخستنا هه‌لبژارتنان دێ د كۆمبوونا چاڤه‌رێكرى یا لایه‌نێن سیاسى یێن كوردى دا هێته به‌حسكرن".
ژ لایێ خۆڤه، عیرفان عه‌بدولعه‌زیز رابه‌رێ گشتى یێ ته‌ڤگه‌را ئیسلامى بۆ گاڤ دیاركر "د ڤێ ره‌وشا نوكه دا باوه‌ر ناكه‌ین هه‌لبژارتن بهێنه كرن، ئه‌گه‌ر بهێنه كرن ژى، هه‌تا ته‌وافوقه‌كا سیاسى دناڤبه‌را هه‌مى لایه‌نێن سیاسى دا نه‌هێته كرن، پشكداریێ د هه‌لبژارتنان دا ناكه‌ین".
