گاڤ

سەرۆک نێچیرڤان بارزانی ئەڤرۆ د سالڤەگەرا 50یێ یا بۆمبەبارانکرنا زانکۆیا سلێمانییێ دا کو ل وی دەمی ل قەلادزێ بوو، پەیامەک بەلاڤ کر و تێدا راگەهاند: ل وی دەمی رژێما بەعس تاوانەکا مەزن ل دژی گەلێ کوردستانێ کر.

نێچیرڤان بارزانی، سەرۆکێ هەرێما کوردستانێ ئەڤرۆ سپێدێ پەیامەک بەلاڤ کر و تێدا نڤیسییە: ئەڤرۆ بیرەوەرییا خەمگینا 50 سالییا شەهیدبوونا ب دەهان قوتابی و مامۆستایێن زانکۆیا سلێمانییێ و وەلاتییێن سڤیل یێن قەلادزێ ل بیردئینین کو ل 24ی نیسانا 1974ێ بوونە قوربانییێن تاوانەکا دی یا رژێما وی دەمی یا ئیراقێ. سلاڤان بۆ گیانێ وان یێ پاقژ دهنێرین.

سەرۆک نێچیرڤان بارزانی د پەیاما خۆ دا دوپات کرییە: شەهیدکرنا قوتابی و مامۆستایێن زانکۆیێ و خەلکێ سڤیل یێ قەلادزێ د بۆمبەبارانەکا ئاسمانی یا ترسنۆک دا، هێز و ورەیەکا زێدەتر دا گیان و ئیرادەیا بەرهنگارییێ و رویبرویبوونا زولم و دکتاتۆرییێ و گەلێ کوردستانێ بهێزتر بەردەوامی دا خەبات و تێکۆشانا خۆ.

سەرۆکێ هەرێما کوردستانێ د پەیاما خۆ دا داخواز کرییە: پێدڤییە نوکە ژی گەلێ کوردستانێ ب ئێکڕێزی و پێکڤەژیانا خۆ رێ ل دوبارەبوونا تاوانێن ب وی رەنگی بگریت و ب هیڤی کار بۆ پاشەرۆژەکا باشتر بکەت.