جۆ بایدن: ئهرمهنى ژ لایێ ئۆسمانییانڤه تووشى رهشترین بزاڤا ژناڤبرنێ بووینه د دیرۆكێ دا
گاڤ
سهرۆكێ ئهمریكا جۆ بایدن ل سالڤهگهڕا كومكوژییا ئهرمهنییان ژلایێ تركێن ئۆسمانى ڤه كو ل 24 نیسانا سالا 1915ێ دهستپێكربوو، راگههاند، ئهو رێزێ ل خۆڕاگرییا گهلێ ئهرمهن دگریت یێ لسهر دهستێ ئۆسمانییان بهرى 109 سالان تووشى رهشترین بزاڤا ژناڤبرنێ بووى د دیرۆكێ دا، كو ملیۆن و نیڤ ئهرمهنى هاتبوونه جینۆسایدكرن.
ئهڤرۆ 24ى نیسانێ ل سالڤگهڕا 109ێ یا كۆمكوژییا ئهرمهنییان، جۆ بایدن، سهرۆكێ ئهمریكا راگههاند، سوزێن خۆ بۆ ژبیرنهكرنا قوربانیێن جینوسایدكرنا ئهرمهنییان نوى دكهین.
بایدن گۆت: ههوا قڕكرنا ئهرمهنییان ل 24ى نیسانا سالا 1915ێ دهستپێكر، دهمێ دهستههلاتدارێن ئۆسمانى ل ستهنبۆلێ دهست ب گرتنا رهوشهنبیر و سهركردهیێن جڤاكا ئهرمهنى كرى.
سهرۆك بایدنى گۆت ژى، دهمێ ئهو بههیدارییا ڤێ كارهساتێ دكهن د ههمان دهمدا رێزێ ل گهلێ ئهرمهن دگرن كو پشتى رورى ب روى رهشترین قڕكرن بوى د دیرۆكێ دا، ئهرمهنیێن ماین دهست ب ئاڤاكرنا جیهانا مه یا نوى كرن. ژیان و كولتورێ خۆ پاراستن و پێكهاتهییا خۆ یا نهتهوهیی لسهرانسهرى جیهانێ بهێزكر داكو پشتڕاست ببن ئهو هۆڤاتییا 109 سالن بهرى نها رویداى دوباره نهبیتهڤه.
ههروهسا بایدنى دوپاتییا ئهمریكا نیشاندا بۆ بهرگریكرنێ ژ مافێن مرۆڤى و دژاتیكرنا نهژادپهرستیێ.
ئهمریكا ل سالا 2021ێ ب فهرمى دانپێدان ب قڕكرنا ئهرمهنییان كر و وهكو جینۆساید ناسكر، ڤێ ئێكێ نهڕازیبوونا تركیا ب دویڤ خۆدا ئینا.