گاڤ

پەیڤدارێ حکومەتا هەرێما کوردستانێ ئەڤرۆ بۆ دەنگێ ئەمریکا بەحس ل پرۆژەیێ هژمارا من و مووچەیێ فەرمانبەرێن هەرێما کوردستانێ کر.

پێشەوا هەورامانی راگەهاند؛ پرۆژەیێ هژمارا من د پرسا مووچەیی دا ژ کارێن پێشینە یێن حکومەتا هەرێما کوردستانێ یە، ئەگەر ئەو پرۆژەیە نەهێتە قەبویلکرن، بتنێ بەهانەنە، ژ بەرکو ئەوا د ناڤ هژمارا من دا هەیی گەلەک پترە ژ وێ یا ئیراقێ کری و دبێژینێ تەوتین. لەورا هەر چارەسەرییەکا د ناڤبەرا هەولێر و بەغدایێ دا ل سەر حسابا پرۆژەیێ هژمارا من بهێتەکرن، دێ هێتە رەتکرن.

هەروەسا گۆت: دهێتە چاڤەرێکرن د چەند رۆژێن بهێت دا شاندەکا هەرێما کوردستانێ سەرەدانا بەغدا بکەت ژبۆ دانوستاندنان ل گەل وەزارەتا دارایی دەربارەی چارەکرنا کێشەیێن د ناڤبەرا هەرێم و بەغدا ل سەر پرۆژێ هژمارا من و ئەلکترۆنیکرنا مووچەیێ فەرمانبەران دێ تەوەرەکێ گرنگ یێ دانوستاندنان بیت.

پێشەوا هەورامانی دا زانین ژی؛ تەوتین بتنێ کارتەکا وەرگرتنا مووچەیە، نەک هژمارا بەنکی و پشکەک ژ وان بەنکان ژی نیشانا پرسیارێ ل سەر هەیە، ژ بەر ڤێ یەکێ ئەو ل چارەیەکێ دگەرن و چارە ژی نابیت ل سەر حسابا هژمارا من و دەستبەردانێ ژ وی پرۆژەی بیت. فەرمانبەرێن ئیراقێ هاتینە سەرپشککرن کو بانکەکا ئەهلی یا حکومی بهەلبژێرن، بۆچی بۆ فەرمانبەرێن هەرێمێ یا سنۆردار کرییە؟.