گاڤ 
دوهی ل پارێزگەها نەینەوا ل دەما دەستپێکرنا شەهیانەکێ، زاڤا ب گولـلەیێن کەیڤخۆشییێ برینداربوو و ئەڤرۆ ژیانا خۆ ژدەستدا.
ل گۆرەی مەدیایێن ناڤخۆ یێن پارێزگەها نەینەوا، دوهی ل ئالییێ راستێ یێ باژێڕێ مووسلێ ل تاخێ تل رومان، شەهیانا گەنجەکی ب ناڤێ عومەر نەسیف کەزاوی دهاتە کرن، ل دەستپێکا شەهیانێ هندەک ژ کەسوکارێن وی بۆ دەربڕینێ ژ کەیفخۆشییا خۆ، گولـلە هاڤێتن، ئێک ژ گولـلەیان ب زاڤای کەفتبوو و بریندار ببوو.
پشتی برینداربوونێ، ئەو گەنج بۆ نەخۆشخانێ هاتبوو ڤەگوهاستن و ئەڤرۆ سپێدێ ژیانا خۆ ژدەست دا.
هەرچەندە حکومەتێن هەرێما کوردستانێ و ئیراقێ بەردەوام رێنماییان ددەن و دبێژنە وەلاتییان کو ب چ ئەگەر بیت چەکی بکار نەئینن، لێ تا نوکە کلتۆرێ هاڤێتنا گولـلەیان بۆ دیارکرنا کەیفخۆشییێ ل ئیراقێ مایە.