سه‌رۆكێ جڤاتا وه‌زيران: پێدڤيه گه‌نده‌لى ب سيسته‌م بهێته ژناڤبرن
بەلاڤ بکە
مه‌سرور بارزانى سه‌رۆكێ حكومه‌تا هه‌رێمێ راگه‌هاند؛ ژ بۆ زێده‌كرنا داهاتى و په‌يداكرنا ده‌ليڤه‌يێن كارى، ده‌ستهه‌لاتێن مه‌زن ب پارێزگه‌هـ و ئيداره‌يێن سه‌ربخۆ هاتينه دان و حكومه‌تا هه‌رێما كوردستانێ جوداهيێ دناڤبه‌را پارێزگه‌هان دا ناكه‌ت.
ئاشكرا ژى كر؛ حكومه‌تا ئيراقێ فشارێن مه‌زن ل سه‌ر كۆمپانيێن په‌ترۆلێ كرينه دا كو هه‌رێما كوردستانێ په‌ترۆلا خۆ نه‌فرۆشيت.
ئاماژه دا وێ چه‌ندێ ژى؛ پێدڤيه گه‌نده‌لى ب سيسته‌م بهێته ژناڤبرن و كه‌سێن گه‌نده‌لكار رويبروى ياسايێ ببن.
گۆت ژى "هه‌ر كه‌سێ به‌لگه ل سه‌ر گه‌نده‌ليێ هه‌بن، بلا پێشكێش بكه‌ت".
سه‌باره‌ت په‌يوه‌نديێن هه‌رێمێ ل گه‌ل وه‌لاتان خۆياكر؛ به‌رژه‌وه‌نديێن هه‌ڤپشك و رێزگرتن بنه‌مايێن په‌يوه‌نديێن مه‌نه ل گه‌ل وه‌لاتان.
ئاشكرا ژى كر؛ به‌غدا د ئه‌ڤ ساله دا ب تنێ دو جاران 200 مليار دينار بۆ هه‌رێمێ هنارتينه كو پێدڤيه هه‌يڤانه بنێريت.
ل دۆر ره‌وشا ئيراقێ دياركر؛ ئيراق ژ به‌ر خرابيا برێڤه‌برنا وه‌لاتى د قه‌يرانه‌كا كوير دايه.
ديار ژى كر؛ گه‌له‌ك مادده‌يێن ده‌ستوورێ ئيراقێ د سالێن بۆرى دا كار پێ نه‌هاتيه كرن و پێدڤيه لايه‌نێن سياسى يێن كوردى ب ستراتيژيه‌كا نيشتيمانى سه‌ره‌ده‌ريێ ل گه‌ل به‌غدا بكه‌ن.
