گاڤ

گۆپیتكا نه‌ته‌وه‌یێن ئێكگرتى بۆ گوهۆڕینێن سه‌قایى ل مسرێ ب دوماهى هات، وه‌لاتێن ئه‌ندام ژى رێككه‌فتنه‌كا دیرۆكى بۆ دروستكرنا سندۆقه‌كا تایبه‌ت ب قه‌ره‌بووكرنا گوهۆڕینێن سه‌قایى ئیمزا كر.

ئه‌ڤرۆ ئێك شه‌مبێ 20-11-2022ێ ب ئیمزاكرنا رێككه‌فتنه‌كا دیرۆكى بۆ دروستكرنا سندۆقه‌كا تایبه‌ت بۆ گوهۆڕیێن سه‌قایى وه‌لاتێن گۆپیتكا نه‌ته‌وه‌یێن ئێكگرتى بۆ گوهۆڕیێن سه‌قایى ل مسرێ دوماهى ب كارێن خۆ ئینا.

ئه‌نتۆنیۆ گۆتیرێز، سكرتێرێ گشتى یێ نه‌ته‌وه‌یێن ئێكگرتى گۆت: دانانا سندۆقه‌كێ ده‌ستكه‌فته‌كێ مه‌زنه‌ و كاره‌كێ مه‌زن مایه‌ بهێته‌كرن بۆ وێ یه‌كێ باوه‌ریا هاتیه‌ ژ ده‌ستدان دوباره‌ بهێته‌ ڤه‌گه‌ڕاندن.

د گۆپیتكێ دا كو ل شه‌رم شێخ ل وه‌لاتێ مسرێ بوو گوهۆڕینێن سه‌قایى، برس، ئاواره‌یى و كۆچبه‌رى و مه‌ترسیێن وێ ل سه‌ر ئاستێ جیهانێ هاتنه‌ به‌حسكرن.