وەکو یا دیار د ده‌مه‌كێ کێم دا دوو رویدانێن پەقینێ ژ دەرئەنجامێ ھەلچوونا غازێ ل ھەردوو پارێزگەھێن سلێمانیێ و دھۆکێ ل تاخێن "کازیوە" و "گرێ باسێ" دروستبوون. کو ب مخابنی ڤە د ھەردوو رویدانان دا ب دەھان کەس بوونە قوربانی. تراژیدیایێن ب ئەڤی ئاوایی د ناڤ ھەر مللـەتەکی دا کارتێکرن و دەرھاڤێژێن نوی ل دویف خۆ دا د ئینن. مللـەتێ کورد ژی وەکو مللـەتەکێ ستەم دیتی نە جارا ئێکێ یە تووشی نەھامەتی و تراژیدیایان دبیت، بەلکو ھەڤال جێمک بووینە ھەر ژ سەردەمێن کەڤن تا نوکە. و گوھرینا دھێتە دیتن بتنێ شێوازێ تراژیدیایێ یە. چونکە مللـەت یەکەیەکا ئێکگرتییە و پێکڤە تووشی رویدانان دبیت و خەم و شینییا وان ئێکە. گەلەک یا پێدڤیە کار ل سەر فرەلایەنییا ئێکگرتنێ بھێتەکرن، و ھەر تاکەکێ کۆمەلێ ھەست پێبکەت. لەورا ھەبوونا ئەڤان رویدانێن دوماھیێ پێدڤیە بکەینە ھێڤێنێ ئاشتیا کومەلایەتی و کارتێکرنا وان ب شێوازێن جوان دابرێژین دا کو ھەر تاکەک پێ ئاشنا ببیت و ھەست ب رۆلێ بەرپرسیاریا خۆ ل ھەمبەر بنەمایێن ئێکگرتنا مللـەتی و ئاشتیا کومەلایەتی بکەت. وەکی ل سەری مە ئاماژە ب فرەلایەنییا ئێکگرتنێ دایی، یا گرنگە ئێکگرتن د ھەمی رەھەندێن خۆ دا بھێتە کاراکرن و بتنێ ئێکگرتنەکا دەمکی و کارتۆنی نەبیت...

د ناڤ ھەرێما کوردستانێ دا ھەبوونا ئاشتیا جڤاکی دناڤ ناوچەیێن جودا جودادا پێدڤیەکا ھەنوکەییە، لەورا ل سەر لایەنێن دەستھەلاتدار ژی یا پێدڤیە ببنە پالدەرێن ئەڤێ دیاردا گرنگ و ئەرێنی. چونکە دروستبوونا رویدانێن "کازیوە" و "گرێ باسێ" بووینە ئەگەرێ رێخۆشکرنێ و ژینگەھەکا گۆنجایی ژ بۆ ئەڤێ چەندێ دروستکریە. ھەروەسا گۆتنا سەرۆکێ ھەرێما کوردستانێ رێزدار "نێچیرڤان بارزانی" ب چەند رۆژەکان بەری رویدانێن ناڤبری، ئاماژەیەکا روھن و ئاشکرایه‌ کو نوکە پتر ژ ھەر دەمەکێ دی ھەرێما کوردستانێ پێدڤی ب ئەڤێ چەندێ ھەیە، کو د ناڤ گۆتنێن خۆ دا ئاماژە ب چەمکێ (زۆنا کوردستان)ـێ دایە. لەورا ئەم ھەمی وەکی تاکێن جڤاکی پێدڤیە گۆتنا ناڤبری گرنگ وەربگرین و ب ھەمی باوەری ڤە کار ژبۆ پەیداکرنا (زۆنا کوردستان)ـێ بکەین...

شینوار فەرھاد

قوتابیێ ماستەرێ د زانستێن سیاسی و پەیوەندیێن ناڤدەولەتی دا

24ـی نۆڤەمبەرا 2022ـێ