كوتله‌يا وه‌زارى یا پارتى بۆ ئێكه‌تيێ: نه‌بنه رێگر ل هه‌مبه‌ر بجهئينانا بڕيارێن حكومه‌تێ
بەلاڤ بکە
گاڤ
كوتله‌يا پارتى يا وه‌زارى به‌رسڤا راگه‌هاندنا ئێكه‌تيێ ل دۆر داخۆيانيێن سه‌رۆكێ جڤاتا وه‌زيران دا و داخواز ژ ئێكه‌تيێ كر كو نه‌بيته رێگر ل هه‌مبه‌ر بجهئينانا بڕيارێن حكومه‌تێ.
د راگه‌هاندنه‌كا كوتله‌يا وه‌زارى يا پارتى ئه‌ڤرۆ دوشه‌مبيێ دا هاتيه؛ پشتى په‌ياما سه‌رۆكێ حكومه‌تا هه‌رێما كوردستانێ و به‌حسكرنا وى بۆ وان كێشه‌يێن ئێكه‌تيێ بۆ حكومه‌تا هه‌رێمێ دروستكرين، ب مخابنى ڤه تيما ئێكه‌تيێ ل جهێ دانوستاندنێ و كۆمبوونێ ب كارڤه‌دانه‌كا لاواز به‌رسڤ دا.
تێدا هاتيه ژى؛ به‌شدارينه‌كرن ل هنده‌ك كۆمبوونێن حكومه‌تێ، ده‌ركه‌فتن ژ گرۆپێ وه‌تسئه‌پى و ئاماده‌نه‌بوونا وان ل كۆمبوونێن جڤاتا وه‌زيران بۆ به‌حسكرن و چاره‌سه‌ريا كێشه‌يان ب رامانا ره‌ڤينێ ژ به‌رپرسياريا ياسايى، سياسى و ئيدارى دهێت.
د راگه‌هاندنێ دا هاتيه ژى؛ ئه‌گه‌ر كێماسيه‌ك د كابينه‌يا نوكه يا حكومه‌تێ دا هه‌بيت ژى، ژ ئه‌نجامێ وێ سياسه‌تێ و رێگريێ يه يا ئێكه‌تى په‌يره‌و دكه‌ت.
ديار ژى كريه؛ ئێكه‌تيێ دڤێت لاوازيا پێگه‌هێ خۆ يێ جه‌ماوه‌رى و كێشه‌يێن ناڤخۆيى ب وێ چه‌ندێ به‌رزه كه‌ت كو رێكێ نه‌ده‌ت حوكمرانيه‌كا سه‌رانسه‌رى و شه‌فاف د بوارێن دارايى، داهات و حوكمێ ياسايێ ل سلێمانيێ دا بهێنه په‌يره‌و كرن و زێده ژى كريه "خه‌لكێ سلێمانيێ و هه‌له‌بجه ديده‌ڤانێن وێ چه‌ندێ نه كا ئه‌و خه‌لكه د چ نه‌ئارامى و نه‌بوونا خزمه‌تگۆزاريان دا دژيت".
كوتله‌يا وه‌زارى يا پارتى ئاماژه دايه وێ چه‌ندێ ژى؛ جڤاتا وه‌زيران بڕيار دابوو هێزێ بۆ رێگريكرنێ ل كارێن دزيێ و دژى به‌رژه‌وه‌نديا وه‌لاتيان بۆ هه‌مى سنوورێن هه‌رێما كوردستانێ ره‌وانه بكه‌ت، لێ هه‌وه ل پارێزگه‌ها سلێمانيێ رێگرى ل ده‌ستپێشخه‌ريه‌كا هۆسا كر.
خۆيا ژى كريه؛ هه‌ر ژ رۆژا ئێكێ يا تيرۆركرنا شه‌هيد هاوكار جاف، مه ب فه‌رمى داخواز ژ هه‌وه كر كو د لێكۆلينان دا د هه‌ڤكار بن لێ هه‌وه خۆ ژ ڤى بابه‌تى دزى و تا نوكه ژى د ئاماده نينن تۆمه‌تبار بهێنه به‌رده‌م دادگه‌هێ.
د راگه‌هاندنێ دا هاتيه ژى؛ نابيت ژ ترسا كێمبوونا ده‌نگان هوين ئاسته‌نگان د رێكا پرۆسێسه‌كا ديمۆكراسى يا وه‌كى هه‌لبژارتنان دا دروست بكه‌ن.
كوتله‌يا پارتى داخواز ژى ژ ئێكه‌تيێ كريه كو نه‌بيته رێگر ل هه‌مبه‌ر بجهئينانا بڕيارێن حكومه‌تا هه‌رێما كوردستانێ و دياركريه "ئه‌گه‌ر هه‌وه پشكه‌ك ژ گۆشتى هه‌يه و پشكه‌كا دى ژى دڤێت، ژ ئافكا گۆشتى ژى ڤه‌خۆن".
