چينێ دهستپێشخهريهك بۆ ئاگربهستێ ل ئۆكراينا راگههاند و زێلێنسكى ل گهل هندهك بڕگهيێن وێ يه
گاڤ
چينێ دهستپێشخهريهكا 12 خالى بۆ ئاگربهستێ ل ئۆكراينا راگههاند و سهرۆكێ ئۆكراينا رازيبوونهكا رێژهيى ب دهستپێشخهريێ دهربڕى.
وهزارهتا دهرڤه يا چينێ دهستپێشخهريهك بۆ ئاگربهستێ ل ئۆكراينا ژ 12 خالان د دهمهكێ دى دا ژ ئهڤرۆ ئهينيێ بهلاڤكربوو، ئهو ژى: رێزگرتن ل سهروهريا وهلاتان، دهستبهردان ژ مێنتالێتيا شهڕێ سار، راوهستاندنا كارێن دژمنكارانه، بهردهوامكرنا گۆتوبێژێن ئاشتيێ، ديتنا چارهيهكێ بۆ قهيرانا مرۆڤتى، پاراستنا مهدهنيان و لێكگوهارتنا ئێخسيران، پاراستنا سلامهتيا دامهزراوهيێن ناڤۆكى، كێمكرنا مهترسيێن ستراتيژى، بساناهيكرنا بهرههمئينانا دانهوێلهيان، راوهستاندنا سزايێن تاكلايهنانه، پاراستنا سهقامگيريا هناردهكرنێ و پشتهڤانيكرن ل قووناغا دوباره ئاڤهدانكرنێ.
ئاژانسا رۆيتهرز ئهڤرۆ ئهينيێ بهلاڤكريه؛ ڤولوديمير زێلێنسكى سهرۆكێ ئۆكراينا رازيبوونهكا رێژهيى ل سهر دهستپێشخهريا چينێ بۆ ئاگربهستێ ل ئۆكراينا دهربڕيه.
ديار ژى كريه؛ سهرۆكێ ئۆكراينا پێشوازى ل هندهك بڕگهيێن دهستپێشخهريا چينێ كريه.
زێلێنسكى د ڤى دهربارى دا گۆت "ئهگهر هندهك هزرێن گونجاى ل گهل رێزگرتنێ ل ياسايا نێڤدهولهتى و سلامهتيا ئاخا وهلاتان ههبن، دێ د ڤێ خالێ دا ل گهل چينێ كار كهين".
سهرۆكێ ئۆكراينا ديار ژى كر؛ چينێ پلانهكا دروست پێشكێش نهكريه بهلكو هندهك هزرن و ئهم ل سهر هندهك بڕگهيێن دهستپێشخهريێ د رازى نينين.
زێلێنسكى ژ چينێ خواست كو چهكى نهدهته رۆسيا، لێ ل گهل وێ چهندێ خۆياكر "هزرا چينێ وهك ههڤپهيمانا رۆسيا د ناڤبهينكاريێ دا بۆ ئاشتيێ تشتهكێ دلخۆشكهره".
ئهڤرۆ 24/2/2023 سالڤهگهڕا ئێكێ يا شهڕێ رۆسيا ل سهر ئۆكراينايه كو ب دههان هزار كهس تێدا بووينه قۆربانى و ب مليۆنان ئۆكراينى ژ بهر وێ ئاواره بووينه.
شهڕ و ئالۆزى تا نوكه ل ژمارهيهكا دهڤهران ل رۆژههلاتێ ئۆكراينا دناڤبهرا سوپايێن رۆسيا و ئۆكراينا دا بهردهوامن.