وهزیرێن دهرڤه یێن ئیران و سعوودیێ ب تێلهفوونێ ل گهل ئێك ئاخفتن
گاڤ
لێكنێزیكبوونا ئیران و سعوودیێ دێ رهنگڤهدانێن مهزن ل سهر ئاستێ دهڤهرێ پهیدا كهت و ئێكهم پێنگاڤ ژى ب پهیوهندیهكا تێلهفوونى د ناڤبهرا وهزیرێن دهرڤه یێن ههر دو وهلاتان دا دهستپێكر.
ریازێ راگههاند، وهزیرێن دهرڤه یێن ئیران و سعوودیێ ب ههلكهفتا هاتنا مهها رهمهزانێ ب رێكا تێلهفونی ئاخفتینه و ل نێزێك دێ كۆمبن بۆ وێ یهكێ ریككهفتنا ئاشتیێ د ناڤبهرا خۆ دا بجهـ بین و ڤهكرنا بالیۆزخانه و كونسلخانهیان ژى بهحس بكهن.
د راگههاندنهكێ دا وهزارهتا دهرڤه یا سعوودیێ دیاركر، شاهـ فهیسهل بن فهرحان، وهزیری دهرڤه یێ سعوودیێ پهیوهندى ب حسێن ئهمیر عهبدوللاهیان، وهزیرێ دهرڤه یێ ئیرانێ كریه.
راگههاندنێ دیاركریه، ههر دو وهزیر رێككهفتن د دهمهكێ نێزیك دا كۆمبوونهكا دو قۆلى بكهن بۆ وێ یهكێ رێك ب ڤهكرنا بالیۆزخانه و كونسلخانهیێن ههر دو وهلاتان بهێته دان.
بۆچى پهیوهندیێن ئیران و سعوودیێ تێكچووبوون؟
ل سالا 2016 سعوودیێ كهساتیهكێ ئۆلى یێ شیعه مهزههب ب ناڤێ نهمر ئهلنهمر سێداره دا و كارڤهدانێن مهزن ل دووڤ خۆ هێلان، ئیرانیان هێرشى سهر هنارتیێن دبلۆماسى یێن سعوودیێ كر، ژ وى دهمى تا نوكه پهیوهندیێن ریاز و تههرانێ نهمابوون.
ناڤهڕۆكا رێككهفتنا ریاز و تههرانێ چى یه؟
ئیرانا پتریا وێ شیعهمهزههب و سعوودیه كو پتریا وێ سونه مهزههبن، دێ جارهكا دى بالیۆزخانهیێن خۆ د ههیاما دو مههان دا ڤهكهن، كو پێشتر ژ بهر ناكۆكیان هاتبوون داخستن و هندهك رێككهفتنان ژى دێ بجهـ ئینن كو ناڤهڕۆكا وان بهرى 20 سالان هاتیه ئیمزاكرن و گرێدایى ئێمناهیێ و ئابۆرى نه.