گاڤ

سازیا گالۆپ یا راپرسیان یا ئەمریکی ئەڤرۆ ئەنجامێن نویترین راپرسیا خۆ ل هەرێما کوردستانێ و دەڤەرێ بەلاڤ کر و تێدا دیار کریە کو ژیانا خەلکێ هەرێما کوردستانێ ژ گەلەک روویان ڤە ژ یا خەلکێ دی یێ دەڤەرێ باشترە.

سازیا گالۆپ راگەهاندیە؛ پشتی کەفتنا رژێما بەعس ل سالا 2003یێ، بەرۆڤاژی دەڤەرێن دی یێن ئیراقێ، هەرێما کوردستانێ بەرەڤ رەوشەکا باشتر چوو، رەوشا ئابۆری بهێزبوو و حزبێن سیاسی یێن کوردان ژی پتر نێزیکی هەڤدو بوون.

هەروەسا هاتیە، پشتی هاتنا سوپایێ ئەمریکا بۆ ئیراقێ ٪79 یا وەلاتیێن هەرێما کوردستانێ ژ سەرکرداتیا ئەمریکا ل دەڤەرێ و ببیتە هەڤپەیمانەکا بهێز بۆ هەرێمێ درازی نە، ب ڤێ یەکێ کوردستان دبیتە مەزنترین هەڤپەیمانیا سیاسی یا ئەمریکا ل دەڤەرێ، پشتێ هەرێمێ ئسرائیل دهێت کو ٪69 یا خەلکێ وێ ل سەر هەڤپەیمانیا ئەمریکا درازی نە. هەروەسا ل دەڤەرێن دی یێن ئیراقێ ژی بتنێ ٪28 یا خەلکی ل گەل ئەمریکا نە.

دایە زانین ژی، د 20 سالێن بووری دا هەرێما کوردستانێ چیرۆکا سەرکەفتنێ یا ئیراقێ بوو، لێ لاوازبوونا رەوشا ئابۆری دبیت مەترسیان بۆ وان دەستکەفتان پەیدا بکەت.

پتریا خەلکێ هەرێما کوردستانێ هەست ب ئێمناهیێ دکەن:

د راپرسیێ دا هاتیە، ل سالا 2003یێ و پشتی هەرفینا رژێما بەرێ، ٪56 یا خەلکێ هەرێما کوردستانێ هەست ب ئێمناهیێ دکر ل دەڤەرێن خۆ و ٪43 یا خەلکێ دەڤەرێن دی یێن ئیراقێ هەست ب ئێمناهیێ دکر، ل سالا 2022یێ ئەو رێژەیە گەلەک بلندبوویە و ٪88 یا خەلکێ هەرێما کوردستانێ دبێژن کو ئەو هەست ب ئێمناهیێ دکەن ل دەمێ ژ مالێن خۆ دەردکەڤن، ل هەمبەر ژی دا ٪72 یا خەلکێ ئیراقێ هەمان بوچوون هەیە.

هەرێما کوردستانێ پەناگەها کەمینەیێن ئیراقێ:

پشتی شەرێ 2003یێ، پتریا تائیفە و پێکهاتەیێن ئیراقێ کەفتنە د رەوشەکا خراب دا و ئێمناهی و سەقامگیریا هەرێما کوردستانێ ئەو گرۆپێن پێکهاتەیان بەرەڤ خۆڤە ئینان، بۆ نموونە کرستیانێن ئیراقێ کو پتریا وان ئاشۆری نە، بەری شەری رێژەیا وان نێزیکی 1.5 ملیۆن کەسان بوون، لێ نوکە کێمتری 200 هزار کرستیانان ل ئیراقێ نە و نیڤا وان ل دەڤەرێن هەرێما کوردستانێ دژین. ٪84 یا پێکهاتەیێن ل دەڤەرێن هەرێما کوردستانێ دژین هەست ب ئێمناهیێ دکەن و ٪59 یا پێکهاتەیێن ل ئیراقێ دژین هەست ب ئارامیێ دکەن ل دەڤەرێن خۆ.

د راپرسیێ دا هاتیە ژی؛ هەرێما کوردستانێ ب ئارامی و پێشوازیا خۆڤە بۆ بیانیان، ژینگەهەکا باش هەیە بۆ کێشانا پرۆژەیێن وەبەرهێنانێ و ل چاڤ دەڤەرێن ئیراقێ باشترە، لێ ل سالا 2022یێ، ٪66 یا خەلکێ هەرێما کوردستانێ دبێژن کو بدەستخستنا دەلیڤەیێن کاری ب زەحمەتە و ل هەمبەر دا ٪65 یا خەلکێ دەڤەرێن دی یێن ئیراقێ هەمان بوچوون هەیە.

سازیان گالۆپ دبێژیت؛ ل گەل باشتربوونا رەوشا ئابۆری یا ئیراقێ، خەلکێ هەرێما کوردستانێ کێمتر دەلیڤەیێن باشترکرنا رەوشا ئابۆری بدەستکەفتینە، ل سالا 2008ێ بتنێ ٪9 یا خەلکێ هەرێمی ژ ژیارا خۆ درازی نەبوون و ل هەمبەر دا ٪34 یا خەلکێ ئیراقێ، لێ ل سالا 2022یێ ئەو رێژەیە ل هەرێما کوردستانێ گەهشتیە ٪16 و ل ئیراقێ ژی داکەفتیە بۆ ٪18.