سهنتهرهك ئهگهرهكێ سهرهكى یێ تووشبوونێ ب ژههراویبوونێ پشتى خوارنێ ل خوارنگههان ئاشكرا دكهت
گاڤ
نزیكى 40% ژ حالهتێن تووشبوونێ ب ژههراویبوونێ پشتى خوارنێ ل خوارنگههان ژ بۆ كاركرنا كرێكارێن خوارنگههان سهرهراى تووشبوونا وان ب نهخۆشیان ڤهدگهڕن ل گۆرهى سهنتهرهكێ ئهمریكى.
سهنتهرێ CDC یێ كونترۆلكرنا نهخۆشیان و خۆپاراستنێ ژێ ل ئهمریكا ئاماژه دا گرنگیا وهرگرتنا كرێكار و خوارنلێنهرێن خوارنگههان بۆ بێهنڤهدانان ل دهمێ تووشبوونا وان ب نهخۆشیان و راگههاند كو 40% ژ حالهتێن ژههراویبوونێ پشتى خوارنێ ل خوارنگههان بۆ كرێكارێن خوارنگههێ یێن تووشبوویى ب نهخۆشیان و پهتایان ڤهدگهڕن.
گرنگه كرێكارێن خوارنگههان ئهگهر د نهخۆش بن، Sick Leave ئانكۆ بێهنڤهدانا نهخۆشیێ وهربگرن، ل گۆرهى پسپۆران.
سهنتهرێ ئهمریكى دیاركریه كو پهیوهندیهك دناڤبهرا كرێكارێن خوارنگههان یێن د دهمێ نهخۆشیێ یان پهتایان دا د كاركرنێ دا بهردهوام بووین و نزیكى 40% ژ حالهتێن ژههراویبوونا خۆراكى پشتى خوارنێ ل خوارنگههان دناڤبهرا سالێن 2017 و 2019 دا ل ئهمریكا ههبوویه.
پهتایێن نورۆڤیرۆس و سالمۆنێلا ژ پترین نهخۆشیان بوون ل دهف كرێكاران یێن بووینه ئهگهرێ نزیكى 800 حالهتێن ژههراویبوونێ ل گۆرهى وێ ئامارێ.
ل گۆرهى ئامارێن CDC، سالانه 48 ملیۆن كهس ل ئهمریكا تووشى نهخۆشیێن ب رێكا خوارنێ دهێنه ڤهگوهاستن دبن، ژ وان ژى 128 هزار كهس چارهسهریێ ل نهخۆشخانهیان وهردگرن و 3000 كهس سالانه ل ئهمریكا ژ بهر وێ چهندێ دمرن.