گاڤ

سه‌رۆكێ حكومه‌تا هه‌رێمێ راگه‌هاند كو ئینڤێست كوردستان دێ ئاسانكاریان بۆ وه‌به‌رهێنه‌رێن ناڤخۆیى و بیانى په‌یدا كه‌ت.
براند و وێبسایتێ ئینڤێست كوردستان ئه‌ڤرۆ دوشه‌مبیێ ب به‌رهه‌ڤبوونا سه‌رۆكێ حكومه‌تێ و ژماره‌یه‌كا وه‌به‌رهێنه‌ر و به‌رپرس و دپلۆماتكارێن بیانى هاته‌ راگه‌هاندن.
ئه‌ڤرۆ ب پشكداریا مه‌سرور بارزانى سه‌رۆكێ حكومه‌تا هه‌رێما كوردستانێ، ژماره‌یه‌كا دپلۆماتكارێن وه‌لاتێن جیهانى ل هه‌رێما كوردستانی و وه‌به‌رهێنه‌رێن ناڤخۆیى و جیهانى رێوره‌سمێن ناساندنا براند و وێبسایتێ ئینڤێست كوردستان Invest Kurdistan ل هه‌ولێرێ برێڤه‌چوو.
مه‌سرور بارزانى سه‌رۆكێ حكومه‌تێ د په‌یڤه‌كێ د چارچووڤه‌یێ رێوره‌سمان دا دیاركر؛ ئینفێست كوردستان دێ هاریكار بیت بۆ به‌رده‌وامیا وه‌به‌رهێنانێ ل هه‌رێمێ و دێ ئاسانكاریان بۆ وه‌به‌رهێنه‌رێن ناڤخۆیى و بیانى ب رێكا به‌رده‌ستكرنا زانیاریان په‌یدا كه‌ت.
گۆت ژى "ئه‌م ب رژدى كار ل سه‌ر وێ چه‌ندێ دكه‌ین كو باوه‌ریا وه‌به‌رهێنه‌رێن ناڤخۆیى و بیانى ب بازارێ هه‌رێما كوردستانێ ب هێز بێخین و ئاسته‌نگیێن بیرۆكراسى كێم بكه‌ین".
ل دۆر په‌یوه‌ندیێن هه‌ولێر و به‌غدا، سه‌رۆكێ حكومه‌تێ ئاماژه‌ دا وێ چه‌ندێ "د سالێن بۆرى دا، سامان و داهاتێ ئیراقێ ب شێوه‌یێ دروست نه‌هاتیه‌ برێڤه‌برن، وه‌لاتیێن هه‌رێمێ تووشى سته‌مێ بووینه‌، هیڤیدارین یاسایا بودجه‌یا ئیراقێ دویر ژ مایتێكرنێن سیاسى بهێته‌ بجهئینان".
زێده‌ ژى كر "مه‌ لێكتێگه‌هشتنه‌كا باش ل گه‌ل محه‌مه‌د شیاع سوودانى سه‌رۆكوه‌زیرێ ئیراقێ هه‌یه".