گاڤ

وەزارەتا کۆچ و کۆچبەرێن ئیراقێ دوماهیک ژڤان بۆ داخستنا بئێکجاری یا کەمپێن ئاوارەیان ل پارێزگەهێن ئیراقێ و هەرێما کوردستانێ دیار کر و رۆژنامەیەکا فەرمی یا ئیراقی راگەهاند: مەلەفێ ئاوارەیان دێ ب ئێکجاری هێتە گرتن.

موەفەق کازم رێڤەبەرێ کۆچ وکۆچبەران ل پارێزگەها بابل بۆ رۆژنامەیا سەباح یا نێزیکی حکومەتا ئیراقێ راگەهاندیە: دەهی مەها ئیلۆنا ئەڤسالە دوماهیک ژڤانە بۆ داخستنا ب ئێک جاری یا دوسەیا ئاوارەبوونێ ل ئیراقێ و داخستنا هەمی کەمپێن ئاوارەیان.

ناڤهاتی ئاماژە دایە وێ چەندێ ژی، پشتی ئەڤی ژڤانی هەر ئاوارەکێ نەڤەگەریتە جهێ خۆ یێ سەرەکی ل سەر مال و ملکێن خۆ ناڤێ ئاوارەیێ دێ ژسەر هێتە راکرن و سەرەدەری وەک ئاوارە ژلایێ حکومەتێ ڤە ل گەل ناهێتە کرن.

گۆت ژی پشتی ئەوی دەمێ هاتیە دیاریکرن هەر کەسەکێ ل هەر پارێزگەهەک یان هەر جهەکی دی وەک ئاوارە مابیت و نەڤەگەریتە سەر مال و وارێ خۆ یێ دروست ئەوی مافێ ئاوارەییێ نامینیت و دێ وەک خۆجهـ ل سەر ئەوێ پارێزگەهێ و ب رەزامەندییا وی هێتە جێگیرکرن.

هەتا نووکە ژی لگۆری ئامارێن نەفەرمی، پتری 664 هزار ئاوارەیێن نافچەیێن جودا یێن ئیراقێ ل هەرێما کوردستانێ دناڤ و ژدەرڤەی کەمپان دمینن و هەتا نووکە ژی دیار نینە ئەگەر هەرێم دێ پابەندی ئەڤێ بریارا وەزارەتا کۆچ وکۆچبەرێن ئیراقێ بیت بۆ داخستنا کەمپان یانژی نە