دیار عەبدولعەزیز

"کەلتووری خوەسەرییا خوە هەیە، دەمێ کو ژ بازنەیێ خوە دهێتە لادان، ژ گرنگییا خوە یا واتەیی و جوانیناسییێ (ستاتیکا) ڤالا دبیت و دبیتە جۆرەکێ مەترسییێ ژی." تیۆدۆر ئادۆرنۆ.

گەر تە بڤێت رەسەنی و ئاستێ پێشکەفتنا مللەتەکی بزانی، بێی ئێک و دو، تەماشەی کەلتوورێ وی مللەتی بکە، ب تایبەتی کا وی کەلتووری چ تایبەتمەندی هەنە و هونەرێ وی چەند خوەروو و رەسەنە. ژ بەر کو خەباتا کەلتووری پتری یا فیزیکی باندۆرا خوە هەیە. لەورا خەباتا چاندی گەلەک ب هووربینی دهێتە کرن، بێی پلانێن هوور، هزر و لێگەریانێن چر، پراکتیزەکرنەکا ساخلەم و دووڤچوونەکا بەردەوام، مەحالە کەلتوور پێش بکەڤیت و پاراستنا بهایێن کەلتووری ژی بزەحمەتترە.

فەستیڤال، شینبوون، وەرار و بەردەوامی:

دەهەمین فلمەفەستیڤالا دهۆکێ یا ناڤناتەوەیی (ناڤدەولەتی)، کو گرنگترین بوویەرا کەلتووری یا باژارێ دهۆکێ یە، هەلبەت هەبوونا ڤێ فلمەفەستیڤالێ بۆ هەر کوردەکی گرنگە، ب تایبەتی بۆ هونەرمەندان و ب تایبەتتر ژی بۆ سینەماکاران، کو گەلەک جاران ئەو ب جەژنا خوە دزانن. خویایە فەستیڤال ژ خەمخۆرییا چەندین هونەرمەند و رەوشەنبیران پەیدا بوویە، هەڤدەم ژینگەها دهۆکێ ب خوە ژی زەمینەسازی بۆ دانانا پرۆژەیەکێ وەسا هەبوو، ب حکمێ وێ یەکێ کو ل دهۆکێ شانۆکار و سینەماکارێن باش هەنە، پێرا خەلک ژی پێشوازییەکا گەرم ل فلمەفەستیڤالێ دکەن. ئەڤە ژ بلی کو فەستیڤالا ناڤهاتی ڤەرێژا پشتەڤانییا دارایی یا حکومەتێ یە ل پرۆژەیان (سابسیدییا ئابووری) و گەلەک فاکتەرێن دی، کو رێ ل بەر هەبوون و بەردەوامبوونا فەستیڤالەکا ب ڤی ئاوایی خوەش دکەن. کەواتە نە حنێرە مە فەستیڤالەک هەبیت، ل گەلەک باژارێن دنیایێ فەستیڤالێن هۆسا و باشتر ژی هەنە.

نڤیسکار و سینەماکارێ فرەنسی گێ دیبوور دبێژیت: مانا بهایێن راستەقینە یێن کەلتووری، ب تەنێ ب رەتکرنا کەلتووری دهێتە کرن. رەتکرن ل ڤێری نە نەفیکرن و ژناڤبرنە، بەلکو رەخنەکرن، ئاڤاکرن و لڤاندنا بەر ب پێشە. دا کو کەلتوورێ هەیی رەت بکەین، دڤێت ڤان پرسیاران ژ خوە بکەین: مە چەند شیایە گەر بۆ گەرێ فلمەفەستیڤالێ پێش بئێخین؟ چەند بینەرێن چالاک، رەخنەگر و داهێنەر ل دۆرماندۆری فلمەفەستیڤالێ کۆم بوونە؟ ڤێ فەستیڤالێ چ ئاسۆیێن نوو ل بەر هونەرمەندان ب گشتی، سینەماکاران ب تایبەتی، نڤیسکار، وەرگر ب هەمی جۆرێن خوە یێن بینەر و وەبەرهێنەر ڤە و.. هتد ڤەکرینە؟ مە فەستیڤال بۆ پەیدابوونا گوهەرینان کرییە؟ یان وەکی گەلەک بوویەر و چالاکییێن دی ب تەنێ نیشاندانە و هەو؟ باشە فەستیڤال پێش دکەڤیت یان پاش دکەڤیت؟ دیسان باندۆرا وێ ل سەر هونەر و جڤاکی چی یە؟ ئەڤە و چەندین پرسیارێن گرنگ هەنە کو هەوجەی بەرسڤێن زەلالن.

ڤایە دەهـ گەرێن فلمەفەستیڤالا دهۆکێ دەرباز بوون و هینا ئەو ژ کێماسییان بێبەهر نینە، هەلبەت ڤێ فلمەفەستیڤالا نازدار تێرا خوە پەسن و دەستخوەشی وەگرتینە و پترییا هونەرمەند، بینەر و تا رادەیەکی دەستهەلاداران ژی پشتەڤانی لێ کرییە، تا کو گەهشتییە ڤی ئاستی، ئەڤە ناهێتە وێ واتەیێ کو ژ رێگری و ئاستەنگان دوور بوو، لێ ب هەر حال شیا وان ئاستەنگان دەرباز بکەت و ئێدی پشتەڤانی و پەژراندن پتری رێگری و ئاستەنگان بووینە دیفاکتۆ. کەواتە ل شوونا دلێ مە ب رەوشا فلمەفەستیڤالێ بسۆژیت، پیدڤییە مە پتر شەهنازی ب هەبوونا فلمەفەستیڤالێ بربا، کو مخابن شاشی وکێماسییان نەهێلایە فلمەفەستیڤال بگەهیتە جهێ خوە یێ ژ هەژی.

ڤەگوهاستنا شەهرەزاییێ:

نڤیسکار و فەیلەسۆفێ فرەنسی ژیل دۆلۆز، ل دۆر رۆلێ سینەمایێ دبێژیت: سینەما تێکدا ژ گوهەرینکاری و رێکخستنان پێکدهێت. کەواتە دەما سینەما هەبیت، گەرەکە گوهەرین و رێکخستن ژی هەبن. ب دەربرینەکا دی، دەما گوهەرین و رێکخستن نەبن، سینەما بەر ب هندابوونێ یە. ب ڤی کوژییێ دیتنێ، گەر ئەم بخوازین فلمەفەستیڤالا دهۆکێ سال بۆ سالێ پێش بکەڤیت، گەرەکە فەستیڤال بەردەوام خوە نوو و ئاڤا بکەت، بۆ ڤێ مەرەمێ ئەو پێدڤی ب شەهرەزاییا تایبەتمەندێن جیهانی و کوردێن خودان-ئەزموونە، دیسان هەوجەی رەخنە و دیتنێن بەردەوام یێن رەخنەگر و بینەرانە. گرنگترین خال ژی ئەوە، فۆکسا کەسێن خودان-ئەزموون ب تەنێ ئەو نەبیت ل گۆپیتکان بمینن، خەلاتان ببەن و ناڤ و پەیوەندییێن وان د بەرفرەهبوونێ دا بن. گەر تا رادیەکی رەوش ئەڤە بیت، ل دەستپێکێ ئەو کەسە ستەمێ ل خوە دکەن، پاشی ل فلمەفەستیڤالێ و ستەما هەری مەزن ژی ل نفشێن نوو دکەن. لەورا پێدڤی یە ئەو ئەزموون و شەهرەزاییا کو دبیت بەرهەمێ هزرکرنا وان کەسان بیت و دبیت ژی هندەک جاران بەرهەمێ پلە و پۆستێن وان بیت، بۆ کەسێن دی و نفشێن نوو ژی بهێنە ڤەگوهاستن. بۆ نموونە، گەر هندەك دەرهێنەر یان بەرهەمئینەر شیابن پشتەڤانییا (سەرمایەدار، وەبەرهێنەر، بازرگان، سازی و رێکخستییێن جیهانێ و تاکو حکومەتێن وەلاتێن هەرێمی و جیهانێ.. هتد) پەیدا بکەن، مخابن ئەو پشتەڤانییە پتر ل سەر ئاستێ کتێ بوویە و نەبووینە دیاردە! ئەڤە ژ بلی شەهرەزایی و داهێنانێن بیاڤێن نڤیسین، پرۆدەکشن، تەکنیک، دەرهێنان و بازارکرنێ.. هتد ژی وەکو پێدڤی ژ زەبەلاحێن سینەمایا کوردی بەر ب ناڤ و سەروچاڤێن نوو شۆر نەبووینە! دوبارە دێ ڤەگەرمە دۆلۆزی دەما دبێژیت: فەلسەفەیێ لڤین ئینا ل ناڤ هزرێ، سینەمایێ ژی لڤین د وێنەیان دا پەیدا کر. راستە فلمەفەستیڤالا دهۆکێ پشکا نووهات هەیە، لێ ل گۆرەی ئەنجام و بەرهەمێن ڤێ پشکێ، دیسان ل گۆرەی وان سەرەدەری و رەفتارێن ل گەل پشکدارێن نووهاتێ دهێنە کرن، مرۆڤ نێزیکی مخابنییەکێ دبیت، ئەو ژی کو مە لڤینا ئالۆگۆرکرنا هزر و شەهرەزاییان جەمداندییە و هەما بێژە قۆرغکرییە ژی. ل ڤێری گومانەکا دی بۆ من چێدبیت، ئەز یێ بینەر ئێدی ب چرییا خۆلێن دەربازبوویی، داهێنەر و سینەماکارێن خودان-ئەزموون ل فلمەفەستیڤالێ نابینم، نزانم ئەو ژ بەر کێماسی و نەدادپەروەرییان زیزبوونە؟ یان ژی بەخیلن و وان نەڤێت ئەزموون و شەهرەزاییا خوە بۆ نفشێن نوو ڤەبگوهزێن؟

ئەم خەباتا سینەمایی بۆ کێ دکەین؟

د. لەزگینێ چالی د هەڤپەیڤینەکا خوە دا ل گەل کەنالا وارێ، تەکەز کر: چاڤێ سینەمایا کوردی و فەستیڤالێن کوردی ل بینەر و وەرگرێن ژدەرڤە یە. گەلەک رەهەند و واتە ژ ڤێ گۆتنا دکتۆری دپەشن، یێن کو چەند گەرێن فلمەفەستیڤالا دهۆکێ دیتین، دێ پتر د مەرەما د. لەزگینێ چالی گەهن؛ مە خوە نەنیاسییە، ئەم بیانیپەرێسین، مە مفا ژ سەربۆر و ئەزموونێن خوە وەرنەگرتییە و مە کولتوورێ بینەرییا فلم و سینەمایێ پەیدا نەکرییە. لێ بنێرە هینا د جڤاکێ مە دا هەڤۆکێن (من ئەو کرە فلم، تو غێر سینەمای.. هتد) هەنە، دا کو بهایێ سینەمایێ بهێتە زانین، گەرەکە ژینگەهەکا هشیار و پاقژ بۆ سینەمایێ بهێتە بەرهەڤکرن. ئەڤ ژینگەهە ژی ب هەبوونا بینەرەکێ هشیار و سازییێن وەکی فلمەفەستیڤالێ پەیدا دبیت، کو ئەڤ سازییە رۆلەکێ باشتر و کاریگەرتر بگێرن و ژ رۆتین و قۆرخکرن و بەرتەنگکرنا ئاسۆیێن داهێنانێ دوور بکەڤن.

راستە سینەما کۆمەکا لڤینێن وێنە و دەنگان نیشان ددەت، لێ ئەڤ نیشاندانە ب تەنێ کۆمکرنا چەند وێنەیان نینە، هەروەکی (گێ دیبوور) دبێژیت، نیشاندانا سینەمایێ گرێدایی وێ پەیوەندییا جڤاکی یە، یا کو د ناڤبەرا خەلکی دا هەیی، کو ئەڤ پەیوەندی یە ناڤبەینکارییێ د ناڤبەرا وێنەیان دا دکەت. ل ڤێریێ دیبوور تەکەزێ دکەت کو: نیشاندان وێنەیەکە، رەخەکێ وێنەی دیارە، لێ ل پشت وێنەی دنیایەکا نەدیار و ئالۆزە، ژ ئالییێ خەلکێ ڤە بەردەوامی ب پەیوەندییان دهێتە دان. د نیشاندانێ دا پێشکەفتن دیارە، لێ د ناڤەرۆکێ دا نا. ئەڤا دیبووری گۆتی، بەحسێ وێنەیێن سینەمایی یە و رۆلێ نیشاندانێ یە، کا ئەم قەبارەیێ وێنەی مەزنتر بکەین و ژ فلمەکی دەربازی فلمەفەستیڤالەکێ ببین، ئانکو گەر فلم کۆمەکا وێنەیان بیت، ژ نوو فلمەفەستیڤال کۆمەکا فلمانە، ب هەمی جۆرێن (کاتیگۆرییێن) خوە ڤە. ئەم یێن بینەر چ دبینین؟ دا کو پەیوەندییێ تەمام بکەین، دیسان تەماشە بکەین کا ل پشت وێنەیێ فلمێن فلمەفەستیڤالا دهۆکێ ب خوە چ هەیە؟ ئەو ژی هەکەر مە بینەران دەرفەتا دیتنا پترییا فلمان هەبیت! ژ بەر کو هێشا باژارێ مالخوێیێ فلمەفەستیڤالێ، هۆلەکا تایبەت ب سینەمایێ و نیشاندانا فلمان ڤە نینە، ئەوێن هەیی ژی یان یێن کۆنگرەیانن سەر ب زانینگەهەهێ ڤە یان ژی یێن مۆلەکا بازرگانی یا کەرتێ تایبەتن و ب زۆری 100 بینەران دحەوینین! ئەو چی یە وەسا دکەت کو دامەزرێنەر، رێکخەر، رێڤەبەر و سەرپشکارێن فلمەفەستیڤالێ نەشیاینە قەناعەتێ بۆ جهێن بەرپرسیار چێبکەن، کو هۆلێن تایبەت یێن سینەمایی بۆ باژێرەکێ خودان فلمەفەستیڤالەکا ناڤنەتەوەیی چێبکەن؟ عزرا ژ قبحەتێ مەزنتر ژی ئەوە، فلمەفەستیڤال پشتی پتری دەهـ سالێن ئەزموونێ، نەشیایە پەرتووکەکێ ل دۆر سینەمایێ پارڤە بکەت! بەلکو ب تەنێ بزاڤەکا ئێکانە یا موزیکژەن "بێکەس نووری" هەیە، کو ب پەرتووکەکێ ل دۆر "موزیکا سینەمایێ" ملێ خوە دایە ل بەر ڤێ ڤالاهییێ. خوەشبەختانە و ژ ملەکێ دی ڤە، دەرهێنەر "شینوار کەمال" ژی مژوولی چێکرنا پەرتووکەکێ یە ل دۆر "هونەرێ حەفتێ" و دبیت ئەڤسالە ئەو پەرتووکە رۆناهییێ ببینیت. وەلحاسل بینەری دەرفەتا دیتنا هەمی فلمان نینە، تا کو بشێت دەربازی وێنەیێ ل پشت فلمی ببینیت، دیسان پەرتووک و ئالاڤێن هشیارکرنێ نینن کو بهایێ سینەمایێ بهێتە زانین، دا کو گۆتنا دیبووری بهێتە پەژراندن، کو پەیوەندییا جڤاکییا بینەری ناڤبەینکارییێ د ناڤبەرا وێنەیان دا بکەت، وەرگر نقۆمی دیمەنێن فلمان ببیت و دوبارە واتەیێ بدەتە وێنە و لڤینێن سینەمایێ.

درووشمێن شرین و کەتوارەکێ تەحل

(زمانێ دایک) مژارا سەرەکی یا گەرا ڤێ جارێ یا فلمەفەستیڤالا دهۆکێ بوو. د زمانزانییێ دا مەرەم ژ "زمانێ دایک" زمانێ دەڤەرێ یە. ب گۆتنەکا دی "زمانێ دایک" ناهێتە وێ واتەیێ کا دایکا تە ب چ زمان دئاخڤیت، ئەو زمانێ تە یێ دایکە. بەلکو زمانێ ژینگەها تە چی یە، ئەو زمانێ تە یێ دایکە.

جوانە و گرنگە فلمەفەستیڤالەک گرنگییێ ب پرسێن وەکی زمانی بدەت، کو زمانێ دایکێ ل ڤێ دەڤەرێ زمانێ کوردی یە، ئەڤ زمانە تێرا خوە تووشی وێرانی و تێکدانێ بوویە. فلمەفەستیڤالەکا ناڤنەتەوەیی بهێت و خەما زمانەکێ رەسەن و دەولەمەندێ وەکی کوردییێ بخۆت، فۆکسا خوە ل سەر پرسێن زمانی دابنیت و پانەلێن تایبەت ل دۆر پرسێن زمانی ساز بکەت، ئەڤە ب تەنا سەرێ خوە کارەکێ پیرۆز و خەباتەکا مەزنە. لێ گەر ئەڤ خەباتە ب تەنێ درووشم بیت و گاڤا دەربازی پراکتیزەبوونێ بوو، رەوش ب رەنگەکێ دی بیت و بگرە بەروڤاژی درووشمێ خوە بیت، هینگێ ئەو چالاکی و درووشمە جهێ دووڤچوونێ نە و نابیت ئەو شاشییە بهێنە قەبوولکرن.

چاوا چێدبیت مژارا فلمەفەستیڤالەکا ناڤنەتەوەیی "زمانێ دایک" بیت و زمانێ وێ ب خوە تێکدا شاشی و کێماسی بن؟ ل دەستپێکێ رووپەلێن فلمەفەستیڤالا دهۆکێ ل تۆرێن جڤاکی ب ڤێ هایدارییێ مژارا خوە راگەهاند: ‎بو گەرا دەهێ یا فلمەفیستیڤالا دهۆک یا نێڤدەولەتی مژارا سەرەکی دێ (زمانێ دایک) بیت. ئەڤە دەربرینە ب خوە ژ رێزمانا کوردی دوورە، (بکەر + بەرکار + کار) کو پێدڤییە هۆسا با: (زمانێ دایک) دێ مژارا سەرەکی یا گەرا دەهێ یا فلمەفەستیڤالا دهۆکێ یا ناڤدەولەتی بیت. پاشی پۆستێ وان هۆسا بەردەوام دبیت: ژبەرکو زمان ئێک ژ ئالاڤێن هەری ب هێزە یێن ئالوگورکرنا کولتوری و هەڤنیاسینێ و سینەما بخوژی ب رێکا زمانی پەیاما خو یا مرۆڤاتی دگەهینیت. ل ڤێرێ ژی ژ ئالییێ رستەسازی، رێزمانێ ڤە شاشی هەنە و دڤیا هۆسا با: ژ بەر کو زمان ئێک ژ ئالاڤێن هەری بهێز یێن ئالوگۆرکرنا کەلتووری و هەڤنیاسینێ یە، سینەما ب خۆ ژی ب رێکا زمانی پەیاما خۆ یا مرۆڤاتی دگەهینیت. ئەڤە ژ بلی شاشییێن رێنڤیسێ و خالبەندییێ. جارا برادەرێ کەرکووکی گۆتی "مەعقوول چی یە؟" زمانێ پترییا پۆستەر، تۆرێن جڤاکی، بەلاڤۆک و پێشکێشکاران هەلگرێن شاشی و کێماسییان بیت و هەڤدەم مژارا سەرەکی زمانێ دایک بیت! ئەڤە هندەك نموونە نە ژ شاشییێن زمانی ل تۆرێن جڤاکی و بەلاڤۆکا فلمەفەستیڤالێ: چالاکیێن دەهەمین فلمەفێستیڤالا نێڤدەولەتی یا باژیری دهۆک. شاشە

چالاکیێن دەهەمین فلمەفێستیڤالا ناڤدەولەتی یا باژێرێ دهۆکێ. درستە.

جار دنڤیسن (فێستیڤاڵ) جار (فێستیڤال) جار ژی فیستیڤال، جار (فیلم) جار (فلم)، جار (جێوازی) جار (جیاوازی) ئەو ب خوە جوداهی یان جداهی باشترە، ، جار (کەلتۆر) جار (کولتور). جار (گۆمان) جار (گومان) و.. هتد. شاشی گەلەکن و دێ بزاڤێ کەم هندەك نموونەیێن دی پراکتیک بکەم:-

 هزرو بیران. شاشە. هزروبیر یان هزر و بیر. درستن.

ئەڤ سالە فێستیڤالێ گرنگیەکا تایبەت هەیە جیاواز ژ سالێن بۆری. شاشە.

ڤێ سالێ، فێستیڤالێ گرنگیەکا تایبەت هەیە و ژ سالێن بۆری جودایە. درستە.

ورۆلێ وێ یێ دیاردپرۆسەیا چاکسازیا جڤاکی دا. شاشە.

و رۆلێ وێ یێ دیار د پرۆسەیا چاکسازیا جڤاکی دا. درستە.

ئەڤ سالەدێ. شاشە. ئەڤ سالە دێ. درستە.

لدۆر شاشە. ل دۆر. درستە.

شێوەکێ. شاشە. شێوەیەکێ درستە.

پێشڤەچوونێن پەیدا دبن دبیاڤێ سینەمایێ دا و زمانی ب شێوەکێ تایبەت، شاشە.

پێشڤەچوونێن بیاڤێ سینەمایێ ب گشتی و زمانی ب تایبەتی، درستە.

بۆ وێ چەند هژمارەکا تایبەتمەندان هاتینە مێهڤانکرن. شاشە

بۆ وێ چەندین تایبەتمەند هاتینە مێهڤانکرن. درستە

ئەرێ سینەمایا کوردی رۆل هەبوویە د دانەنیاسینا کەلتۆرێ کوردیدا. شاشە.

ئەرێ سینەمایا کوردی رۆل د دانەنیاسینا کەلتوورێ کوردی دا هەبوویە. درستە.

سەرەرای ئەم زەنگینین ب داستانێن کوردی چ دویر و چ نێزیک. شاشە!

سەرەرای کو دویر و نێزیک، ئەم ب داستانێن کوردی زەنگینین. بەرئاقلترە.

دێ بڕێڤەدبەن. شاشە. دێ رێڤەبەن یان دێ ب رێ ڤە ببەن. درستن.

ئەڤە ژ بلی ب دەهان شاشی و نەرێکخستنێن دی یێن زمانی، کو هندەک پەیڤ هەر جارەکێ ب ئاوایەکی هاتینە نڤیسین. دوبارە رێنڤیس و خالبەندی هەر نەکارن!

فەستیڤالا مژارا وێ زمانێ دایک، چالاکییا خوە ب ڤی ناڤونیشانی دەست پێ کر:

Duhok International Film Festival Opening Ceremony

و ب ڤی ناڤونیشانی ب دووماهی ئینا:

Closing ceremony of the 10th Duhok International film festival

دزانم فەستیڤالەکا ناڤنەتەوەیی یە و ئێدی وێ شۆپینەرێن بیانی هەنە، لێ د تۆرێن جڤاکی دا جهێ ناڤونیشنێ (تایتلێ) کوردی ژی هەبوو کو دابنن. مانە کوردی زمانێ مە یی دایکە؟ بلا مە شەرم ژ زمانێ خوە یێ دایک نەکربا! ئەڤە ژ بلی کو ل پترییا دانەنیاسینا فلمان، ل دەستپێکێ پێشکێشکار ب ئینگلیزی دئاخفت و پاشی ب کوردییا زمانێ دایک! ئەز باش دزانم کو هەڤالێن تۆرێن جڤاکی ماندیبوونەکا مەزن دبینن، تا کو ب تەکنیکێن هونەری یێن بالکێش رۆمالا فلمەفەستیڤالێ بکەن، دیسان نڤیسکارێن بەلاڤۆکا رۆژانە ژی بەردەوام دخەبتن، دبیت هند گونەها وان نەبیت گەر پۆست و بەلاڤۆکێن وان شاشییێن زمانی، رێنڤیسێ و خالبەندییێ هەبن، لێ هەر چ نەبیت ئەو دشیان لژنەیەکا تایبەت یا زمانی دابنن یان ژی نڤیسینێن وان د فلتەرێ هندەك کەسێن تایبەتمەند را دەرباز ببان. فەستیڤال دەرباز بوو و مە نەدیت جوانەک یان شەهرەزایەکێ دهۆکێ ب زمانێ دایکێ دیتنێن خوە ل سەر فلمێن پشکدار ببێژیت، هەڤدەم نڤیسکارەکێ هێژا بەردەوام دیتنێن خوە ب زارێ سۆرانی هەبوون و ل تۆرێن جڤاکییێن فلمەفەستیڤالێ پارڤە دبوون. ئەم نە دەڤەرپەرستین، بەروڤاژی خوەزی دیتنێن زازاکی و هەوارامی ژی هەبان و ل تۆرێن جڤاکی پارڤە ببان. لێ بەرئاقل نینە کو ل ڤێ دهۆکێ، جوانەک یان تایبەتمەندەک نەبوو ئەو ژی دیتنێن خوە ببێژیت!

خالا مرۆڤی دهێلیتە مەندەهۆش ئەوە، فلمێ دەستپێکی یێ فلمەفەستیڤالێ ب زمانێ عەرەبی دەست پێ کر، هەروەسا خەلاتێ باشترین ئەکتەرێ کورد ژی ب ئەکتەرەکێ عەرەب هاتە دان، ئەم رەگەزپەرست نینن، بلا ئەو فلمە هەبن و ئەو ئەکتەرە خەلاتان ژی ببەن، لێ ب ناڤەکێ دی، نەکو ب ناڤێ باشترین ئەکتەرێ کورد! د ڤێ گەرێ دا کورتەفلمەک ب ناڤێ (موزیك ل پشت سنۆران) هەبوو، مژارا ڤی کورتەفلمی زمان و ناسنامە بوو. لێ کورتەفلمێ رەبەن، ب شەرمینی هاتەنیشاندان و نەچووبوو د پشکا هەڤرکییێ دا! هەڤدەم مژارا کورتەفلمی و مژارا فلمەفەستیڤالێ یەک بوو!

ل داوییێ پرسیار دکەم: ئەرێ ب ڤێ رەوشا هەیی، فلمەفەستیڤالا دهۆکێ یا ناڤنەتەوەیی، شۆپا داهێنانێ گرتییە یان بەر ب سەمتا داهێلانێ یە؟

دیار عەبدولعەزیز

17-12-2023 دهۆك.