مەرڤان بۆتانى

گەلەک جاران ئەز تشتەکى د سەرێ خوە دبێژم، ئا کو ب سەرێ مە کوردان هاتیە تەنێ مە کوردان ب سەرێ خوە ئانیە نە کەسێ دن و نها ژى هەر تم وسا مایە و نە هاتیە گوهارتن. گەر مە پێ باش بە کو ئێدى ئەم چێببن، گەرەک ئەم ب خوە دەستێن خوە دەیننە سەر شاشییێن خوە ئێن کەڤن و ئێن نوو ژى.

 هوون دزانن ئەم کورد  سەر هشک و پەراسی ستوورن، نە ل همبەر کێ، لێ تەنێ ل همبەر خوە و کەسێن خوە. جارێ دیرۆکێ سەروبنبکە و هنەکێ پێدە وەرە خوار، کێ ب قاسى کوردان نەیارتیا هەڤ کریە؟ کێ ب قاسى کوردان ژ هەڤ کوشتنە؟ کێ ب قاسى کوردان چەتەتیا دوژمنان کریە، نە ژبەر چو، لێ تەنێ ژبۆى شکاندنا برایێ خوە ئێ کورد؟ ئیرۆ ژى مخابن هێژ ئەو تشت مایە لێ بەلکو ب رەنگەکێ دن، راستە، سوپاس ژ خودێ رە، کو وەکا بەرێ هەڤ ناکوژن، لێ نەفیا هەڤدو دکن و هەر یەک دبێژە ئەڤە ئەز و یێ همبەر خوە چ راستە راست چ نە راستە راست قەبوول ناکە و هەولا نەهشتنا وى دکە. ببورن گەر ئەز ببێژم کو مە هێژ نکاریە چ وەک کەس، چ وەک کۆمبەستێن سیاسى خوە ژ ئاوایێ فکرکرنا عەشیرتى، دەڤەرکى و بەلکو جارنا باژێرکى ژى رهابکن، مخابن هێژ ئەم گەلەک تەنگ فکردکن لەورا ژى د سەر ئەوێ یەکێ رە کو ئەڤە پترى (٣٠) سالان د سەر تەجروبەیا مە ئا باشۆر رە دەربازبوون، لێ هێژ ئەم عەشیرەتا خوە، بابکێ خوە، گوندێ خوە و باژێرێ خوە ژ نەتەوە و وەلاتێ خوە مەزنتر و ب قەدرتر دبینن و ئەنجام ژى ئەڤە یا کو ئەم دبینن، دوهى ئەم ژ ئیرۆ بهێزتربوون.

تشتێ ئەز دخوازم ل ڤێدەرێ ببێژم ئەڤە: د ئەڤێ قووناغێ دە، کو ب راستى وەکا قووناغەکا تەنگ و تارى دیاردکە ئەم هەوجەدارى فکرکرنەکا مودێرنن و پێشییەکێنە کو ب مێژیەکێ ڤەکرى فکربکە و د سەر هەموو ناڤ و گوند و عەشیر و سومبل و سلۆگان و رەنگێن تەنگ و بچووکێن حزبان رە دەربازببە و هەموو دەنگان ژى د چارچووڤەیەکێ سیاسییێ نووژەن دە گوهداریبکە و قەبوولبکە، د ئەڤی ئالی دە ئەز ب باوەرم پارتى کو خوەدى گرانییەکا نێڤدەولەتى، هەرێمی، ئیراقى و کوردستانى یە دکارە ئەڤى رۆلێ ئەم بەحسژێدکن باش بلیزە و ئالییێن سیاسیێن کوردان و کوردان ب خوە ژى ( مەبەست ئێن هەرێما کوردستانێ)، ب دورستى بگەهینە هەڤ کو ببن خوەدى ئێک رێچک، لێ ئەڤ یەک وەکا بەرى نها مە بەحسژێکرى ب فکرکرنەکا مودێرن و ڤەکرى دچە سەرى و پێشیێن ب ئەڤى ئاواى دناڤا پارتى دە هەنە کو پتریا کەس و ئالیێن سیاسى و ئێن نورمال ژى وان قەبوولدکن و دەریێن خوە بۆ ڤەدکن لێ ئەو هێژ پتر هەوجەدارى پشتەڤانى و ئالیکاریێ نە...