هوزان عبداللە

هەولێر ئێک ژ پایتەختێن ئارام بوو ل رۆژهەلاتا ناڤین، لێ رۆژ ب رۆژ یا دبیتە ئارمانجا مووشەک و درۆنان ژ هەمی لایەکی ڤە، شەرێ ئیران و ئەمریکا ل رۆژهەلاتا ناڤین یێ بەرفرەهـ دبیت کورد ژی ب عەردێ خۆڤە یێن بووینە یاریکەر و یاریگەهەک باش و بەرفرەهـ ژ بۆ ڤان هەردو وەلاتان ب تایبەت ل هەردوو وەلاتێن ئیراق و سووریا. بۆچی ئەم بووینە مەیدانا ململانێ یا شەرێ دناڤبەرا ئەمریکا و ئیرانێ دا؟ بۆچی حزبێن کوردستانی ل هەمبەر هێرشێن درۆنان چ کارڤەدانەکا جددی نەبوویە؟ کی مفادارە ژ شەرێ درۆنان ل ئاخا هەرێما کوردستانێ؟

پشتی دەستپێکرنا شەرێ دناڤبەرا ئیسرائیل و تەڤگەرا حەماس دا ل غەززە؛ ئیراق و هەرێما کوردستانێ و سووریا ژی بووینە جهێ هێرشێن درۆن و مووشەکێن گرۆپێن ژ دەرڤەیی یاسایێ ب بەهانەیا ئارمانجگرتنا هێزێن ئەمریکی و هەڤپەیمانان ل ڤان وەلاتان، ئەم دێ ل ڤێرێ بەس بەحسا خۆ کەین وەک هەرێمەکا فیدرال د ناڤا ئیراقەکا هەرفتی ژ لایێ یاساییێ ڤە، لەنگ و ل بن هەژموونا تمام یا ئیرانێ دا.

هەبوونا هێزێن ئەمریکی ل رۆژهەلاتا ناڤین و وەلاتێن عەرەبی نە تشتەکێ نوی و سەیرە، مەزنترین بنگەهێن ئەمریکی ل وەلاتێن (مسر، کوێت، سعوودیە، قەتەر، بەحرێن، عومان، ئیمارات، ئوردن) هەنە و تا نها بۆ ئێک جار ژی هێزێن ئەمریکی ل ڤان وەلاتان نەبووینە ئارمانجا چ گرۆپ و هێزەکێ پشتی شەرێ حەماس و ئیسرائیلێ، د دەمەکی دا چ کارڤەدانەکا جددی یان کریارەکا ب کردار ژ ڤان وەلاتان نەهاتیە دیتن بەرامبەر شەرێ ئیسرائیلێ ل غەززە، لێ مەیدانا شەر و تولڤەکرنێ  دناڤبەرا ئیران و ئەمریکا دا کەفتیە د هەرێما کوردستانێ دا.

 د ڤان سالێن دویماهیێ دا رۆژ ب رۆژ دەستهەلاتا شیعەیان ل ئیراقێ ل دژی هەرێما کوردستانێ زێدەتر دبیت و بەرپێن مە تەنگتر دبن تا وی راددەیی ئەم بووینە پاریەکێ ب ساناهی و دەستهەلاتا ناڤەندی ب رێیا تاکێ ئیراقی ژی، چ وەزیر، پەرلەمانتار یان ژی کەساتیەک کۆمەلایەتی و ئۆلی بیت یاسایێن دویر ژ دەستوورێ ئیراقێ ل سەر هەرێمێ دسەپینن و حساب بۆ چ یاسا و رێککەفتنەکێ ناهێتە کرن و هەرێم نەشێت رەددا وان کریاران بکەت.

ئیراق ب تەمامی کەفتیە بن دەستهەلاتا ئیرانێ و گرۆپێن سەر ب وێڤە بەغدایێ برێڤەدبەن، ئەگەر سەحکەینێ ئیرانێ و گرۆپێن وێ یێن ژ دەرڤەیی یاسایێ ل ئیراقێ گەلەک رێک هەنە تۆلا خۆ ژ ئیسرائیلێ ڤەکەن د مەیدانا نوکە یا شەری دا (وەک ئەو دبێژن ئەم تۆلا خۆ ژ ئەمریکا ڤەدکەین ل هەمبەر پشتەڤانیا وێ ژ بۆ ئیسرائیلێ) نەکو شەری ڤەگوهێزنە هەرێما کوردستانێ، لێ ئارمانج ل ڤێرە دیار دبیت، ئارمانج ژی ب تنێ لێدانە ل قەوارەیێ هەرێما کوردستانێ. نە ئێکگرتن و پەرتوبەلاڤەییا حزبێن کوردستانێ و شەرێ بێ بنەما یێ راگەهاندنێ ل دژی ئێکودو و بێ هێزییا نوینەر و شاندێن کوردی ل بەغدا وەکریە ئەم ببینە ئارمانجا ئیرانێ و دەستهەلاتا شیعی و گرۆپێن سەر ب وێڤە ب بەهانەیا هەبوونا بنگەهێن ئەمریکی ل کوردستانێ. هێرشا درۆنی یا لسەر هێزێن پێشمەرگەی کو هێزەکا یاسایی یە د دەستورێ ئیراقێ دا مەزنترین دربە ب هەرێما کوردستانێ و ئیراقێ کەفتی لێ مە چ کارڤەدانەکا جددی ژ حزب و لایەنێن کوردی و هەتا بێژین ئیراقی ژی نەدیت.

ئەم هەردەم پشتا خۆ ب ئەمریکا و هێزێن هەڤپەیمانان گەرم دکەین، لێ هەتا کەنگی دێ ئەمریکا چاڤێن رەش بۆ مە کلدەت و سیستەمێ دژی مووشەک و درۆنان بۆ مە دەتە کاری؟ ئەمریکا چەند جاران هوشداری ژ نە ئێکگرتنا ناڤمالا کوردی دایە حزبێن کوردستانێ، لێ رۆژ ب رۆژ دەستهەلاتا گرۆپێن شیعی یێن دەولەتێ برێڤەدبەن ل سەر هەرێمێ یا زێدە دبیت و رەفتارێن پشتی 16 ئوکتۆبەرێ و یێن پشتی هەلبژارتنێن جڤاتێن پارێزگەهان ژی ل کەرکووکێ ئاماژەیەکا دی یا لێدانێ یە ل کوردان و بێی کارڤەدانەک ژ ئەمریکا یان وەلاتەکێ دی هەبیت، ئانکو ئەم ب خۆ ئەگەرێن ڤان هێرشاینە ل سەر کوردان و دیسان هەرێما خۆ، لەوما دبێژین کێ درۆن ئینانە هەولێرێ؟! مانە ئەڤ ژێکدویرکەفتن، نەئێکگرتن و بێهێزیا مەیە ل هەمبەر پرسێن نیشتیمانی و ئاخێ؟ هەر وەلاتەکێ د رۆژهەلاتا ناڤین دا هەی دوبەرەکی و شەرێ دەستهەلاتێ کەفتبیتە دناڤ دا؛ یێ بوویە پاریەکێ ب ساناهی بۆ شەرێ وەلاتێن زلهێز و گرۆپێن چەکدار، ئەنجام ژی ژناڤچوونا خەلکێ وی وەلاتیە و نەمانا سەروەری و ئاخا وەلاتی.

کەس وەک وەلاتیێ هەرێمێ د خەما قەوارەیێ هەرێمێ و پاراستنا سەروەری و ئاخا وێ دا نینە، نموونە ژی بۆ ڤێ چەندێ ب هزاران خۆبەخشان ل شەرێ دژی داعشێ  ل چەپەرێن پێشیێ یێن بەرگریێ بوون، مافێ مەیە د ڤێ هەرێمێ دا ب ئازادی و ئارامی بژین، بەردەوامیا ڤان رەفتاران و برێڤەبرنا سیاسەتا نها یا خەلەت یا حزبێن کوردستانی ل هەرێمێ دێ مە بەرەڤ ئاقارێن نەدیار بەت و دێ بینە پاریەک ب ساناهی و مەیدانەکا باش یا شەری ل رۆژهەلاتا ناڤین، تاکە رێکا ل بەر حزبێن کوردی بۆ راگرتنا هێرشێن مووشەک و درۆنێن دوژمنان  ب تنێ ئێکگرتنە و راگرتنا وی شەرێ بێ بنەما و ساڤا یێ د راگەهاندنێ دا دکەن.