گاڤ

ژ به‌ر كارتێكرنا كۆمپانیا ئوبه‌ر یا خزمه‌تگۆزاریێن هاتنوچوونێ و ته‌كسییان ل سه‌ر كارێ شۆفێرێن ته‌كسییان ل ئوسترالیا، دێ ئه‌و كۆمپانیه‌ 178 ملیۆن دۆلاران وه‌ك قه‌ره‌بۆ ل سه‌ر ژماره‌یه‌كا شۆفێرێن ته‌كسییان یێن سكالا تۆماركرین، دابه‌شكه‌ت.

پارێزه‌رێن وان شۆفێرێن ته‌كسییان یێن سكالا ل سه‌ر كۆمپانیا ئوبه‌ر Uber تۆماركرین ئه‌ڤرۆ دوشه‌مبیێ راگه‌هاندن؛ پشتى شه‌ڕه‌كێ یاسایى یێ درێژ بۆ چه‌ندین سالان ئه‌و شیان بگه‌هنه‌ قه‌ره‌بۆیه‌كێ.

ل سالا 2019، پتر ژ 8 هزار شۆفێرێن ته‌كسییان و خۆدانێن ترۆمبێلێن ب كرێ خۆ كربوونه‌ ئێك و سكالایه‌ك ل سه‌ر كۆمپانیا ئوبه‌ر تۆماركربوون، ل گۆره‌ى سكالایا وان؛ كۆمپانیا ئوبه‌ر هه‌ر ژ ده‌مێ هاتیه‌ دناڤ ئوسترالیا دا ل سالا 2012 وێ كارتێكرنه‌كا مه‌زن ل سه‌ر كارێ وان كریه‌.

شۆفێره‌كێ ته‌كسییان بۆ رۆژنامه‌ڤانان راگه‌هاند بوو؛ ئه‌و نه‌چار ببوو كۆمپانیا خۆ یا ترۆمبێلێن ته‌كسییان ئه‌وا بۆ ده‌مێ 40 سالان كارێ برێڤه‌برنا وێ دكرى بگریت، ئه‌ڤ چه‌نده‌ پشتى كۆمپانیا ئوبه‌ر هاتى، گۆت بوو ژى "من ژێده‌رێ داهاتێ خۆ ژده‌ستدابوو".

مايكل دونێلى پارێزه‌رێ سه‌ره‌كى یێ كه‌یسێ راگه‌هاند "ئێكلاكرنا ب كۆژمه‌یێ 178.3 ملیۆن دۆلاران پێنجه‌م مه‌زنترین ئێكلاكرنا ب كۆم بوو د دیرۆكا یاسایا ئوسترالى دا".