پێنج یانه‌یان دڤێن كریستیانۆ رۆنالدۆى ڤه‌گوهێزنه ناڤ رێزێن خۆ
بەلاڤ بکە
گاڤ
ل ده‌مه‌كێ دێڤێد بێكهام سه‌رۆكێ یانه‌یا ئینتر مایامى یا ئه‌مریكى دڤێت هه‌ڤبه‌ستێ ل گه‌ل كریستیانۆ رۆنالدۆى گرێبده‌ت دا كو رۆنالدۆ و مێسى د ئێك یانه دا یاریێ بكه‌ن، لێ پێنج یانه د رێكێ دانه و دڤێن هه‌ڤبه‌ستێ ل گه‌ل رۆنالدۆى گرێبده‌ن و ب ڤێ چه‌ندێ خه‌ونا بێكهامى ب زه‌حمه‌ت دكه‌ڤیت.
ل گۆره‌ى رۆژنامه‌یا فوتبۆلێرۆ؛ بێكهامى دڤێت هه‌ڤبه‌ستێ ل گه‌ل رۆنالدۆى گرێبده‌ت دا كو بگه‌هیته ستێرێن دى یێن د ئینتر مایامى دا ئه‌و ژى هه‌ر ئێك ژ لیۆنێل مێسى، لویس سوارێز، جۆردى بۆسكێتس و جۆردى ئه‌لبا، لێ سێ یانه‌یێن پۆرتۆگالى و یانه‌یه‌كا دى ژى یا ئه‌مریكى بزاڤان دكه‌ن هه‌ڤبه‌ستێ ل گه‌ل رۆنالدۆى ئیمزا بكه‌ن.
وێ رۆژنامه‌یێ د راپۆرته‌كێ دا ئاشكرا كریه "سێ یانه‌یێن پۆرتۆگالى یێن خۆدان دیرۆك دڤێن هه‌ڤبه‌ستێ ل گه‌ل رۆنالدۆى ئیمزا بكه‌ن، ئێك ژ وان سپۆرتینگ له‌شبۆنا یانه‌یا به‌رێ یا رۆنالدۆى یه، ب ڤێ چه‌ندێ رۆنالدۆ دێ خه‌ونا دایكا خۆ بجهئینیت ئه‌وا به‌رى نوكه حه‌زا خۆ دیاركرى كو رۆنالدۆ جاره‌كا دى ببیته یاریكه‌رێ وێ یانه‌یێ".
دیار ژى كریه "یانه‌یا دوێ پۆرتۆ یه و یانه‌یا سیێ بێنفیكا یه كو دو یانه‌یێن مه‌زن یێن پۆرتۆگالى نه".
هه‌روه‌سا یانه‌یا ئینتر مایامى نه یانه‌یا ئه‌مریكى یا ئێكانه‌یه كو حه‌زا گرێدانا هه‌ڤبه‌ستێ ل گه‌ل رۆنالدۆى هه‌بیت، به‌لكو یانه‌یا لوس ئه‌نجلۆس گالاكسى ژى حه‌زه‌كا مه‌زن بۆ گرێدانا هه‌ڤبه‌ستێ ل گه‌ل رۆنالدۆى ده‌ربڕیه، ل گۆره‌ى وێ راپۆرتێ.
