گاڤ

جڤاتا ئاساییشا نێڤدەولەتی دەربارەی ئالۆزبوونا رەوشا رۆژهەلاتا ناڤین کۆم بوو، نوینەرێ ئەمریکا و ئیرانێ رەخنە ل هەڤدو گرتن و سکرتێرێ گشتی یێ جڤاتا ئاساییشێ ژی راگەهاند: دەم هاتییە ئالۆزی بهێنە کێمکرن.

شڤێدی جڤاتا ئاساییشا نێڤدەولەتی دەربارەی دویماهی هێرشێن ئیرانێ کرینە سەر ئسرائیلێ کۆم بوو و د کۆمبوونێ دا نوینەرێ ئەمریکا گۆت: هێرشێن ئیرانێ رۆژهەلاتا ناڤین خستیە د مەترسییێ دا و نوینەرێ ئیرانێ د بەرسڤێ دا گۆت "جڤاتا ئاساییشێ د ئەرکێ خۆ یێ پاراستنا ئاساییش و سەقامگیرییا جیهانێ دا شکەستن ئینایە".

ئەنتۆنیۆ گۆتیرێز، سکرتێرێ گشتی یێ جڤاتا ئاساییشا نێڤدەولەتی هوشداری ژ زێدەتر بکارئینانا هێزێ ژ ئالییێ وەلاتێن رۆژهەلاتا ناڤین ڤە دان و راگەهاند: نابیت ب بکارئینانا هێزێن چەکدار و هێزا سەربازی، سەروەرییا وەلاتان بهێتە بنپێکرن.

کۆمبوونا جڤاتا ئاساییشا نێڤدەولەتی د دەمەکی دایە کو شەڤادی ئیرانێ ب سەدان مۆشەک و درۆن ئاراستەی ئسرائیلێ کرن و سوپایێ ئسرائیلێ راگەهاند: ئیرانێ د وان هێرشان دا شکەستن ئینایە و نەشیایە زیانان بگەهینیتە وی وەلاتی.