گاڤ

بهایێ كاكاوێ د بازارێن جیهانێ دا بلند بوو و گه‌هشته‌ بلندترین ئاستێ خۆ د درێژییا دیرۆكێ دا و ژ به‌ر له‌هیێن ل نیجیریا پێنجه‌م مه‌زنترین به‌رهه‌مهینه‌را كاكاوێ پێشبینى هه‌نه‌ بها هێشتا بلند ببن.

ئاژانسان به‌لاڤكرینه‌؛ بهایێ كاكاوێ د گرێبه‌ستێن پاشئێخستى دا گه‌هشته‌ ئاسته‌كێ پیڤانكى یێ نوى د بۆرسه‌یا نیویۆرك دا و بهایێ هه‌ر ته‌نه‌كێ مه‌ترى گه‌هشته‌ پتر ژ 11 هزار دۆلاران.

ژ به‌ر كێمبوونا به‌رهه‌مێ كاكاوێ ل رۆژئاڤایێ ئه‌فریقیا، به‌رهه‌مێن كاكاوێ د بازارێن جیهانى دا كێمبوویه‌ و ئه‌ڤ چه‌نده‌ بوویه‌ ئه‌گه‌رێ بلندبوونا بهایێن وێ، هه‌ڤده‌م كۆمپانیێن دروستكرنا به‌رهه‌مێن شوكولاتایێ رویبروى ئالنگارییان بۆ بده‌ستڤه‌ئینانا كاكاوێ ژ بۆ دروستكرنا به‌رهه‌مێن خۆ دبن.

بهایێ كاكاوێ د گرێبه‌ستێن پاشه‌رۆژێ دا ل نیویۆرك ب رێژه‌یا نزیكى 11% بلند بوون و گه‌هشته‌ ئاسته‌كێ پیڤانكى پشتى بهایێ هه‌ر ته‌نه‌كێ مه‌ترى گه‌هشتیه‌ 11126 دۆلاران.

هه‌ڤده‌م ل بۆرسه‌یا له‌نده‌ن ژى گرێبه‌ستێن كاكاوێ ب رێژه‌یا نزیكى 11% بلند بوون.

ره‌نگه‌ به‌رهه‌مێن كاكاوێ رویبروى هنده‌ك ئالنگاریێن دى ژى ژ به‌ر له‌هیێن ل نیجیریا كو پێنجه‌م مه‌نترین به‌رهه‌مهینه‌را كاكاوێ یه‌ ل جیهانێ ببن.