جاسم سه‌بری

بۆچی هوشیاریا تاکێ کورد نەگەهشتیە وی ڕادەی ل پرسێن خوە بگەرت، ئەرک و مافێن خوه‌ یێن سرۆشتی بزانت یان خوە ناس بکەت یان بشێت سەرەدەرییەکا شارستانی دگەل وێ پێشڤەچوون و پێشکەفتنا نها بکەت، ئەڤا د چەرخێ وی دا روو ددەت؟

دبت ئەڤ پرسە پێدڤی ب ڤەکۆلینەکا هویر یا دیرۆکی و جڤاکی و ئابووری و سیاسی و پەروەردەیی و مرۆڤی بت، هەتا ئەم بگەهن وێ چەندێ کا بوچی یان سەدەم چنە تا نها تاکێ کورد بگشتی هوشیاریەکا ساخلەم و درۆست لدەف پەیدانەبوویە، کا بوچی پیڤەرێن تاکێ کوردێ دلاوازن و پتریا جارا بریار و لڤینێن تاکێ کورد نەل ئاستێ پێتڤی نە لهەمبەر هەر روودانەک و بابەتەکێ گرێدایی ژیانێ بگشتی .

وەک من لسەری ئاماژە بهندێ دای دبت گەلەک ئەگەر هەبن، لێ بدیتنا من ئەگەرێ هەری کاریگەر و ئەگەرێ سەرەکیێ ئەڤێ چەندێ ئەوە تاکێ کورد بۆ دەمەکێ کورت بتنێ ژی وەک مرۆڤەکێ ژیانا وی مسوگەر نەژیایە و هەردەم تاکێ کورد لهەمبەر دوو ئەزمون و ئالنگاریێن بهێز خەباتکریە.

یا ئێکێ: هەردەم تاکێ کورد د هەولا پاراستنا گیانێ خوەدایە، هەر ژ دەسپێکا ناساندنا خوە وەک کەسەکێ کورد زمان، راستی ئێرش و داگیر کرن و ئەنفال و قرکرن و ڕەڤ و گەفان بوویە و هەردەم گیانێ وی ژ لایێ دوژمنێن وی ڤە د مەترسیێ دا بوویە و پیەکێ وی دمالدا و پیەکێ وی دگوری دا بوویە .

یا دووێ: چجاران تاکێ کورد لگورەی پێتڤیێن ژیانا خوە ئارام نەبوویە و هەردەم بزاڤێن بدەستخستنا نانێ ژیانا خوە کرینە و چجاران لژێر سیستەمەکێ دروست یێ بەردەوامێ ژیانێ دەرباز نەبوویە هەم لسەر دەمێ بندەستیێ تا قوناغا دەستهەلاتا کوردی یا ڤێ دۆماهیێ و پتریا تەمەنێ خوە و کەدا خوە بو بدەستخستنا نانێ رۆژێ مەزاختیە و ئەو دەم بۆ تاکێ کورد پەیدانەبوویە خاندن و زانین و پەروەردەییا خوە پێش بێخت و لگورەی وێ پێشکەفتنا لسەردەمێ خوە پێنگاڤان باڤێژت، گوتنەک جوان یا بیرمەند و نڤیسەرێ ئیتالی یێ ناڤدار میکیاڤیللی هەیە دبێژیت (ژبەرکو ئەز بهەژاری ژ دایک بووم، ژبەری ئەز فێری خوشگوزەرانیێ ببم ئەز فێری پێتڤیان بووم)، تاکێ کورد هەردەم ب هەژاری ژدایک بوویە و هەردەم ل شوپا پێتڤیان برێڤەچوویە .

دبت پشتی ئەڤا من لسەری دای دیارکرن، بشێوەیەکێ گشتی پرسەک بهێتە هەبوونێ، ئەرێ 31 سالێن سەربەستیێ و لژێر دەستهەلاتدارییا کوردی تێرا هندێ نەکرن هوشیاریەکا جڤاکی لدەف تاکێ کورد پەیدا ببت (نەخاسمی هندێ ئەڤ قوناغە قوناغەکا بەرهەمداربوویە بۆ کوردستانێ بتایبەتی و جیهانێ بگشتی).

د بنەرەت دا بەرسڤا ڤێ پرسیارێ دیارە، چونکی ئەگەر تاکێ کورد دڤێ قوناغێ دا هوشیاریەکا جڤاکی و رەوشەنبیریەکا گشتی لدەف پەیدا ببا ئەم نەدگەهشتینە ڤێ قوناغا نها یا مەترسیدار ئەڤا ئەم تێدا دژین، دامە تاکەکێ ساخلەم و ماموستایەکێ زانا و قوتابیەکێ ژێهاتی و ئەندازیارەکێ ئاڤاکەر و نوژدارەکێ بسپور و نساخەکێ هوشیار و بازرگانەکێ ب وژدان و دەنگدەرەکێ پاقژ و نڤیسەرەکێ بوێر و روژنامەڤانەکێ راستگۆ و دەستهەلاتدارەکێ خزمەتکار و سیستەمەکێ دادپەروەر و رەوشەنبیرەکێ رێنیشاندەر هتد ... هەبن .

 مخابن د 31 سالێن تەمەنێ دەستهەلاتدارییا کوردیدا ئەم نەشیان سیستەمەکێ پەروەردەیی و رەوشەنبیری و هوشیاری لگورەی داب و نەریت و جڤاک و ئول و پێکڤەژیان و سروشتێ کوردی ئاڤا بکەن و تاکەکێ نشتیمانپەروەر و هوشیار و رەوشەنبیر و ساخلەم بینن هەبوونێ کو ل پرسێن خوە بگەرت کا ئایا چ دڤێت ؟ ئەرک و مافێن وی چنە؟ بوچی دژیت و چەوا بژیت ؟ هەلبژارتنا درۆست بۆ ژیانا وی و پاشەرۆژا وی وەک کەس بۆ مللەتێ وی وەک نەتەوە و بۆ ساخلەمیا وی وەک مرۆڤ کیشکە ؟

بێگومانە بابەت رێژەیی یە و د هەر بوارەکێ دا مە مرۆڤێن هوشیار و رێزان و شارەزا و دیار هەنە، لێ لگورەی قەبارە و کەرەستە و ئامرازێن بەردەست مە نەشیایە کومەلگەهەکا هوشیار ئاڤا بکەین .