ئه‌مريكا سزا ل سه‌ر راديۆ و ته‌له‌فزيۆنا حكومى يا ئيرانێ سه‌پاندن
بەلاڤ بکە
گاڤ نيوز
ئه‌مريكا ژماره‌يه‌كا سزايان ل سه‌ر ته‌له‌فزيۆن و راديۆيا حكومى يا ئيرانێ ژ به‌ر به‌لاڤكرنا دانپێدانێن ده‌سته‌سه‌ركريان ل بن فشاران و ته‌عداريكرنێ سه‌پاندن.
د به‌يانه‌كا وه‌زاره‌تا گه‌نجينه‌يێ يا ئه‌مريكا ئه‌ڤرۆ چارشه‌مبيێ دا هاتيه؛ ئه‌مريكا سزا ل سه‌ر 6 كارمه‌ندێن مه‌زن يێن ده‌سته‌يا راديۆ و ته‌له‌فزيۆنا ئيرانى سه‌پاندن.
تێدا هاتيه ژى؛ ئه‌گه‌رێن سزايێن نوى بۆ به‌لاڤكرنا دانپێدانێن ده‌سته‌سه‌ركريان ل بن فشاران و ته‌عداريكرنێ ل راديۆ و ته‌له‌فزيۆنا حكومى يا ئيرانێ ڤه‌دگه‌ڕيت.
ديار ژى كريه؛ سازيا راگه‌هاندنێ يا حكومى ل ئيرانێ وه‌ك ئالاڤه‌كێ بۆ سه‌ركوتكرنا خۆنيشاندانان و چاڤدێريا حكومه‌تێ ل سه‌ر گه‌لێ وێ هاتيه بكارئينان.
د به‌يانێ دا هاتيه ژى؛ ته‌له‌فزيۆنا ئيرانى هنده‌ك چاڤپێكه‌فتن ل گه‌ل هنده‌ك كه‌سان به‌لاڤكرينه كو تێدا ئه‌و كه‌سه هاتينه نه‌چاركرن كو ببێژن كه‌سوكارێن وان د خۆنيشاندانان دا نه‌هاتينه كۆشتن.
برايان نێلسۆن بريكارێ وه‌زاره‌تا گه‌نجينه‌يێ يا ئه‌مريكا راگه‌هاند؛ به‌رده‌واميا حكومه‌تا ئيرانێ ب نه‌چاركرنا وه‌لاتيان ب دانپێدانان، ئاشكرا دكه‌ت كو حكومه‌تا وى وه‌لاتى نه‌ڤێت راستى بگه‌هيته وه‌لاتيێن وێ و جڤاكێ نێڤده‌وله‌تى.
ديار ژى كر؛ ئه‌مريكا يا پێگيره ب هاريكاريا گه‌لێ ئيرانێ د خۆنيشاندانێن ئاشتيانه يێن وان دا.
هه‌ر ژ 16ى ئيلۆنا بۆرى، خۆنيشاندانێن به‌رفره‌هـ سه‌رانسه‌رى ئيرانێ پشتى گيانژده‌ستدانا ژينا ئه‌مينى پشتى ده‌سته‌سه‌ركرنا وێ ژ لايێ پۆليسێن ئه‌خلاقى ڤه برێڤه‌چووينه و ل گۆره‌ى ئامارێن رێكخراوێن مافێ مرۆڤى پتر ژ 300 كه‌سان د وان خۆنيشاندانان دا گيانێ خۆ ژده‌ستداينه.
