گاڤ
سەرۆککۆمارێ تورکیا ئەڤرۆ پشتی بوویەرێن ڤێ دوماهیێ یێن رۆسیا، پشتەڤانیا خۆ بۆ سەرۆکێ وی وەلاتی راگەهاند.
ل گۆرەی بەیانەکا کۆچکا سەرۆکاتیا تورکیا، رەجەب تەیب ئەردۆگان و ڤلادیمێر پۆتین ئەڤرۆ ب تێلەفۆنێ ئاخفتینە و دانوستاندن دەربارەی شەرێ د ناڤبەرا گرۆپێ ڤاگنەر و سوپایێ رۆسیا دا کریە.
هەروەسا دیار کریە کو ئەردۆگانی پشتەڤانیا خۆ بۆ پۆتینی و سوپایێ رۆسیا دوپات کریە.
یێگڤینی بریگۆجین، سەرکردەیێ سەربازی یێ رۆسیا کو ب سەرۆکێ گرۆپێ "ڤاگنەر" بەرنیاسە و نێزیکی 25 هزار سەربازێن رۆسی ل بن فەرمانا وی نە، سپێدەهیا ئەڤرۆ رۆژا شەمبی 24-6-2023یێ راگەهاند: سێرگی شویگۆ، وەزیرێ بەرگریا رۆسیا خیانەت ل وی کریە، هێزێن وی د ناڤ ئاخا ئوکراینا دا بۆمبەباران کرینە و ژمارەکا وان کوشتینە.
سەرۆکێ گرۆپێ ڤاگنەر هەروەسا گۆت: شویگۆی نەژبۆ چ مەبەستێن ستراتیژی فەرمانا هێرشکرنا ئوکراینا دایە، بەلکو بتنێ بۆ هندێ بوویە پلەیا وی یا سەربازی ببیتە مارشال، لەورا ئەو ژ ئەڤرۆ وێڤە ل بن فەرمانا وەزیرێ بەرگریا رۆسیا کار ناکەت و نوکە ژمارەکا باش یا بنگەهێن سەربازی یێن رۆسیا ل باشۆرێ وی وەلاتی د بن کۆنترۆلا وی دانە.