گاڤ

راپۆرته‌كا میدیایى یا ئسپانى ئاشكرا كریه‌ كو یانه‌یا ریال مه‌درید د رۆژێن بهێت دا دێ ئێكه‌م ئۆفه‌را فه‌رمى پێشكێشى پاریس سان جێرمان بۆ كڕینا كیلیان ئێمباپێ د مێركاتۆیا ڤێ هاڤینێ دا به‌رانبه‌ر 85 ملیۆن یۆرۆیان كه‌ت.

پشتى دویرئێخستنا ئێمباپێ ژ كه‌مپا راهێنانان یا یانه‌یا فره‌نسى، ئه‌و د ره‌وشه‌كا ب زه‌حمه‌ت دا دبۆریت و ب تایبه‌ت پشتى گه‌فێن یانه‌یێ كو ئه‌و دێ وه‌رزێ بهێت ژ ده‌رڤه‌ى یاریگه‌هێ بۆرینیت ئه‌گه‌ر رازى نه‌بیت د ڤێ هاڤینێ دا یانه‌یێ ب جهـ بهێلیت دا كو یانه‌ مفاى ژ بهایێ فرۆشتنا وى ببینیت به‌رى ل هاڤینا سالا 2024 پشتى ب دویماهیك هاتنا گرێبه‌ستێ ب هه‌روه‌یى یانه‌یێ بهێلیت.

تۆرا دێفێنسا سێنترال یا ئسپانى به‌لاڤكریه‌ "فلورێنتینۆ پێرێز سه‌رۆكێ ریال مه‌درید دبینیت كو پاریس سان جێرمان نه‌ د ره‌وشا هێزێ دایه د گۆتوبێژان دا‌ له‌وا دێ بزاڤان كه‌ت ب كێمترین بهاى هێرشبه‌رێ فره‌نسى بكڕیت".

دیار ژى كریه‌ "ئۆفه‌را ئێكێ ژ ریال مه‌درید بۆ كڕینا ئێمباپێ دێ دناڤبه‌را رۆژێن 25 تا 27ى ڤێ هه‌یڤا تیرمه‌هێ دا بۆ یانه‌یا فره‌نسى هێته‌ پێشكێشكرن".

ئاشكرا ژى كریه‌؛ ئۆفه‌را ئێكێ ژ یانه‌یا ئسپانى دێ كڕینا ئێمباپێ بیت به‌رانبه‌ر 85 ملیۆن یۆرۆیێن جێگیر زێده‌بارى 15 ملیۆن یۆرۆیێن دى ل گۆره‌ى هنده‌ك مه‌رجان و ئه‌ڤ چه‌نده‌ گه‌له‌ك دویره‌ ژ بهایێ 200 ملیۆن یۆرۆیان كو یانه‌یا فره‌نسى بۆ فرۆشتنا ئێمباپێ داخواز دكه‌ت.

زێده‌ ژى كریه‌: ره‌نگه‌ كارگێریا ریال مه‌درید بهایێ پێشنیاركرى ب رادده‌یه‌كێ كێم زێده‌ بكه‌ت، لێ هه‌ر نزیكى 200 ملیۆن یۆرۆیان نابیت.

ل گۆره‌ى راپۆرتان، ناهێته‌ چاڤه‌رێكرن پاریس سان جێرمان ل سه‌ر ئۆفه‌را فرۆشتنا ئێمباپێ به‌رانبه‌ر 85 ملیۆن یۆرۆیان رازى ببیت.