گاڤ

لژنه‌یا دارایى یا په‌رله‌مانێ ئیراقێ هیڤییا خۆ ب گه‌هشتنا خشته‌یێن بودجه‌یا سالا 2024 بۆ په‌رله‌مانى د حه‌فتییا بهێت دا ده‌ربڕى.

عه‌توان عه‌توانى سه‌رۆكێ لژنه‌یێ بۆ INA راگه‌هاند "هیڤی ئه‌وه‌ ل حه‌فتییا بهێت بودجه‌ ژ بۆ جڤاتا نوینه‌ران بهێته‌ هنارتن".

ئاماژه‌ ب وێ چه‌ندێ ژى كر؛ پاره‌داركرن ل هنده‌ك پارێزگه‌هـ و وه‌زاره‌تان راوه‌ستیایه‌ و ماینه‌ ل هیڤییا په‌ژراندنا خشته‌یێن بودجه‌یێ.

كورئینان د بودجه‌یێ دا ب ئێك ژ ئه‌گه‌رێن گیرۆبوونا هنارتنا بودجه‌یا ئیراقێ ژ لایێ حكومه‌تێ ڤه‌ بۆ په‌رله‌مانى دهێته‌ هژمارتن، كورتئینان د بودجه‌یا گشتى یا ئیراقێ دا بۆ سالا 2024 زێده‌بوویه‌ و گه‌هشتیه‌ 80 تریلیۆن دیناران ل ده‌مه‌كێ د بودجه‌یا سالا 2023 دا كورتئینان 63 تریلیۆن دینار بوون.

موعین كازمى ئه‌ندامێ لژنه‌یا دارایى یا په‌رله‌مانێ ئیراقێ بۆ گاڤ راگه‌هاند بوو "بۆ مه‌ وه‌ك لژنه‌یا دارایى نه‌یا پێشبینیكرى بوو كو حكومه‌تێ سه‌رجه‌مێ یاسایا بودجه‌یا سالا 2024 ژ 199 تریلیۆن دیناران بۆ 228 تریلیۆن دیناران زێده‌كریه‌، ئه‌ڤه‌ زێده‌كرنه‌كا مه‌زنه‌ ل ده‌مه‌كێ د سالا 2023 دا 142 تریلیۆن دینار هاتبوونه‌ خه‌رجكرن".

ئاماژه‌ ب وێ چه‌ندێ ژى كربوو كو زێده‌كرنا سه‌رجه‌مێ كۆژمه‌یێ یاسایا بودجه‌یێ بوویه‌ ئه‌گه‌رێ زێده‌بوونا رێژه‌یا كورتئینانێ.