گاڤ

ئۆتێله‌كێ ل سلۆڤینیا بڕیارا فرۆشتنا وى ته‌ختێ‌ كریستیانۆ رۆنالدۆ ستێرا پۆرتۆگالى ل سه‌ر نڤستى د مه‌زاده‌كێ دا ب بهایه‌كێ مه‌زن دایه‌ و دێ ئه‌و داهاته‌ بۆ كارێن خێرخوازى بیت.

هه‌لبژارتیێ پۆرتۆگالێ به‌رى چه‌ند رۆژان ل لیوبلیانا پایته‌ختێ سلۆڤینیا یارییه‌كا نێڤده‌وله‌تى ل گه‌ل سلۆڤینیا كربوو و ب ئه‌نجامێ 2-0 هاتبوو دۆڕاندن.

مالپه‌رێ 24ur یێ سلۆڤینى دیاركریه‌ "گه‌له‌ك ژ جه‌ماوه‌رى دڤیان ئیمزایا رۆنالدۆى بده‌ستڤه‌بینن یان وێنه‌یان ل گه‌ل بگرن لێ پشتى ده‌مه‌كێ كێم ژ یاریێ رۆنالدۆى وێرێ ب جهـ هێلا".

راگه‌هاندیه‌ ژى "ژ به‌ر وێ چه‌ندێ وێ ئۆتێلا رۆنالدۆ لێ نڤستى بڕیار دایه‌ دیارییه‌كا تایبه‌ت بده‌ته‌ حه‌زژێكه‌رێن رۆنالدۆى كو وه‌كى دیارییه‌كا خێرخوازی یه‌".

هه‌ر ل گۆره‌ى وى مالپه‌رى "وێ ئۆتێلێ دیاركریه‌ كو ژ به‌ر كو هاتنا رۆنالدۆى رویدانه‌كا تایبه‌ت بوو، ئه‌و دێ سورپرایزه‌كێ به‌رهه‌ڤكه‌ن كو جه‌ماوه‌ر دشێن پشكداریێ تێدا بكه‌ن، ئه‌و ژى دێ ب هه‌ڤكارى ل گه‌ل كۆمپانیا POP TV یا راگه‌هاندنێ چالاكییه‌كا تایبه‌ت ئه‌نجامده‌ن و تێدا دێ ئه‌و ته‌ختێ رۆنالدۆ ل سه‌ر نڤستى ل ئۆتێلێ د مه‌زاده‌كێ خێرخوازى دا هێته‌ فرۆشتن".

دیار ژى كریه‌ "ل دویماهییا ڤێ هه‌یڤێ دێ ئه‌و مه‌زاده‌ هێته‌ كرن و بهایێ ده‌ستپێكى یێ فرۆشتنا ته‌ختى دێ 5 هزار یۆرۆ بن و دهێته‌ پێشبینیكرن بهایێ ته‌ختى ژ ب ده‌هان هزار یۆرۆیان ده‌رباز ببیت".

ئاشكرا ژى كریه‌ "داهاتێ ڤى مه‌زادى دێ بۆ كارێن خێرخوازى بیت".