ئیراق و سعوودیه كارى بۆ كێمكرنا ئالۆزیێن ناڤبه‌را ئیران و ئسرائیلێ دا دكه‌ن
بەلاڤ بکە
گاڤ
سه‌رۆكوه‌زیرێن ئیراقێ ل ئه‌مریكا ب رێكا ته‌له‌فوونێ ل گه‌ل شاهێ سعوودیێ ئاخفت و دوپاتكرن كو نابیت ئالۆزیێن رۆژهه‌لاتا ناڤین زێده‌تر مه‌زن ببن، وه‌ك ئاماژه‌یه‌ك بۆ شه‌ڕێ ئسرائیل و ئیرانێ.
سه‌رۆكوه‌زیرێن ئیراقێ ب سه‌ره‌دانه‌كا فه‌رمى ل ئه‌مریكایه، دێ چاڤ ب جۆ بایدن، سه‌رۆكێ ئه‌مریكا كه‌ڤیت، گرنگترین مژار ئالۆزیێن ده‌ڤه‌رێ نه.
ئاژانسا واس یا سعوودى دیاركریه، محه‌مه‌د شیاع سوودانى، سه‌رۆكوه‌زیرێن ئیراقێ په‌یوه‌ندیه‌كا ته‌له‌فوونى ب محه‌مه‌د بن سه‌لمان، شاهێ سعوودیێ كریه و ره‌وشا ده‌ڤه‌رێ به‌حسكرینه، هه‌ڤده‌م هه‌ر دو ئالییان دوپاتكریه، دڤێت ئالۆزیێن ناڤبه‌را ئسرائیل و ئیرانێ ب دوماهى بهێن و ره‌وش بهێته كۆنترۆلكرن.
هه‌روسا هه‌ر دو ئالییان به‌حس ل مه‌ترسییا شه‌ڕى و ره‌نگڤه‌دانا وى ل سه‌ر ئارامى و ئێمناهییا ده‌ڤه‌رێ كریه و دیاركرینه، یا د شیانێن وان دا بیت بۆ رێگرتن ل به‌رفره‌هبوونا ئالۆزیان ئه‌و دێ كارى كه‌ن.
شه‌ڤا شه‌مبیێ ئیرانێ ب درۆن و رۆكێتان هێرشى ئسرائیلێ كر وه‌ك به‌رسڤه‌ك بۆ هێرشا ئسرائیلێ ل سه‌ر بالیۆزخانه‌یا ئیرانێ ل سووریا، تا نوكه ئسرائیلێ به‌رسڤ نه‌دایه، لێ گه‌ف كرینه كو ئه‌و بێ به‌رسڤ نامینن و به‌رسڤ دێ ل ناڤا ئیرانێ ب خۆ بیت.
پشتى وێ هێرشێ چه‌ندین وه‌لاتان پشته‌ڤانییا خۆ بۆ ئسرائیلێ راگه‌هاند، ژ وان ژى بریتانیا، ئه‌مریكا، فه‌ره‌نسا، ئه‌لمانیا و چه‌ندین وه‌لاتێن دى ژى نیازپاكى بۆ دوماهى ئینان ب ناكۆكییان راگه‌هاندیه.
